Qaqortup kommunia ingerlalluarpoq

Qaqortup kommuniata 2005-imut naatsorsuutimini 6,6 mio. koruuninik sinneqartoorpoq. Bogmesterip Simon Simonsenip sinneqartoorneq makkuninnga tunngaveqarnerarpaa:

- Ilisimaneqartutut maani Qaqortumi annertuumik sanaartortoqarnera tamatumunnga pisooqataalluinnartoq oqaatigissavara. Qorlortorsuaq Ivaarassarlu nutaaq suliarineqarput. Taakku saniatigut inissialiorsinnaalersimavugut pilersaarusiorluareerluta. Tamakku tamarmik maannakkut Qaqortup Kommuneani inissisimanitsinnut pisooqataalluinnarput, Simon Simonsen oqarpoq.

Isumaginninnermi aningaasartuutaasartut ukiuni kingullerni atorneqarpiarsimanngitsut takussutissartaqarpoq.

- Oqaatigisinnaavara sipaarutaasunut ilaasunut ilaammat suliffissaaleqinermut inuussutissarsiornermullu allaffeqarfipput suleqatigiilluinnarlutik suliffissaaleqisunik sulisitsiniarnerminni iluatsilluartumik ingerlavoq. Suliffeqarfinnillu maaniittunik suleqateqarnerat pitsaasorujussuugami taamaalilluni suliffissaaleqisut sulilerseqqipallanneqartalersimapput. Taanna aallaavigalugu aningaasartuutigut sipaarfigisinnaasimavagut.

Ukioq kingulleq paasigatsigu aningaasanik attartortariaqartussaassalluta kiisalu ikinnerpaamik 5 millioninik sinneqartoortariaqarluta immikkoortortaqarfigut misissuitissimavagut. Qujanartumillu ulluinnarni inuit sullinneqarnerinut annertunerusumik ajoqutaanngitsumik sipaarniuteqartoqarsimavoq. Taamaasilluta aamma sinneqartoorsimavugut, Simon Simonsen oqarpoq.

Sinneqartoorutaasummi sumut atorniarpisigit ?

- Massakkut inissisimanerput qujamasuutigeqaarput. Ingerlaarnarlu sinneqartoorutitta atornissaanik pilersaaruteqanngikkallarpugut. Sillimatitut sinneqartoorutigut inissisimatikkallarpagut ukiullu tullianut missingersuusiornissatsinnut taakku naatsorsuutigaagut ilanngutissallugit. Tamatta kommunalbestyrelsemi ilaasortaasugut taamaalilluta arlaannik pitsanngorsaataasinnaasunik ujarsusinnaassaagut.