Qaqortumi utoqqaat ornittagartaartut

Qaqortumi utoqqaat peqatigiiffianni ilaasortat pingasunngornermi ullaakkut qulinut naapittarfittaamminni ullaakkorsioqatigiillutillu erinarsoqatigiipput.

Petrine Isbosethsen 85-inik ukiulik aalajaalluni peqatigiiffimmi ilaasortaavoq.

- Sapinngisamik orniguttuartarpunga. Ukiorlunngikkaangat orniguttuartarpunga peqatigiiffimmut. Aallaqqaataanili aallartikkattali taamanili orniguttuartarpunga, Petrine oqarpoq.

Utoqqaat peqatigiiffiani ilaasortat massakkut 34-iusut piffissami sivisuumi aaliangersimasumik illumik ornittagaqanngereersut illu una ornittagarilissagaat Kommune Kujallermiit aaliangiunneqaqqammersoq, Qaqortumi utoqqaat peqatigiiffianni siulittaasup, Seth Siegismundsenip oqaluttuaraa.

-Tassa massakkut nutseqattaarpallaarunnaasaagut. Aamma nutserneq ulapinnartarami. Nutseqattaarneq Siulersuisunut sulinartarami, Seth Siegismundsen oqarpoq.

Ukiuni tulliattuni sisamani aalajangersimasumik ornittagaqarsinnaalerneq siulersuisut oqiliallaatigaat.

-Aqqutaa iluaaallaqaaq. Pavani Qaavaniikallaratta ornigukkusukkaluartut ornigunneq ajoramik aqqutaa pissutaalluni sivingagami. Maaniileratta assut iluaallappoq, Seth Siegismundsen oqarpoq.

Utoqqaat illutaavat pingasunngornermi tallimanngornermilu quliniit ualikkut pingasut tungaanut massakkut ammasarpoq. Sapaatip akunneranullu ulluni arlaqarnerusuni ammasalernissaq suliniutigineqarpoq.

-Sapaatip akunnera immersussavarput innarluutillit peqatigalugit. Utoqqaat kisimiinginnamik sapinngisamik ullut amerlanerpaat sapaatip akunneranut maaniitarnissarput anguniarparput, siulittaasoq oqarpoq.

Utoqqaat sammisartagarisinnaasaat assigiingitsut aamma pilersaarutigineqarput. Qaqortumi utoqqaat klubbitaavat qanoq atserneqassanersoq aamma unammisitsissutigineqarumaarpoq.