Qaqortumi Tasersuarmi ajunaartoqartoq
Politiit, qatserisartut ambulancellu Qaqortumi Tasersuup eqqaani ataasinngornermi unnukkut takussaapput.
Inummik Qaqortumi tasersuarmiittoqartoq politiinut ataasinngornermi unnukkut arfineq-pingasunut qiteqquteqqammertoq kalerrisaarutigineqareersorlu taama pisoqarpoq.
Annaassiniartartut arnaq Tasersuarmiit qaqitaat 40-t sinnerlugit ukiuliusoq paasinarsivoq. Annaassiniartartut arnaq qaqitartik ikiueqqaarfigereermassuk Qaqortumi napparsimmaviliaanneqartoq, Kalaallit Nunaanni politiit pigaartuisa pisortaat Jørgen Madsen KNR-imut ilisimatitsivoq.
Arnarli taanna toqusimasoq, Qaqortumi politiit ilisimatitsissutigaat.
Arnaq toqusoq sooq Tasersuarmiissimanersoq, politiit suli naluaat.
Arnamut toqusumut ilaqutaasut pisumik kalerinneqqareersut, politiit ilisimatitsissutigaat.
