Qaqortumi takornariaqarnermut allaffik tillinniarfigineqartoq
Unnuaq nalunaaqutaq 04.10 Qaqortumi takornariaqarnermut allaffiup kalerrisaarutaa aallartinneqarpoq. Illoqarfimmilu pigaartut apuummata paasineqarpoq allaffiup qaliani igalaaq ujarak angisooq atorlugu aserorneqarsimasoq. Tillinniallu igalakkut tassuuna isersimagunartut.
Maannamut qarasaasiat angallattakkat marluk, kiisalu GPS-eq tillinneqarsimasutut nalunaarutigineqarput. Angutillu tillinniarsimasutut pasisat tigusarineqaqqammermata, Qaqortumi Politiit pisumut sukumiisumik oqaaseqarsinnaanngikkallarput.
Qaqortumilu politiit marlunngornermi ualikkut angutit sisamat tillinniarsimasutut pasillugit tigusaraat. Tigusarineqartut qanoq utoqqaatiginersut oqaatigineqarsinnaanngikkallartoq Qaqortumi vicepolitikommissæri Erik Lynge Rasmussen knr.gl-mut ilisimatitsivoq.