Qaqortumi politiit: Siku suli qajannarpoq
Qaqortumi Tasersuaq maanna sikuleruttorpoq, meeqqallu sikukkumut arpasaqattaartalersimapput. Sikuli suli saattuaraarsuummat tamanna ajornartorsiutaavoq.
- Maani kisimi taamaattoqarneq ajorpoq, sinerissami taseqarfiusuni, aamma taamak pisoqartarpoq. Meeqqat maanna sikumukarnissap ulorianarneranik angajoqqaaminnit immaqa iluamik oqaaqqissaarneqarneq ajorput, Qaqortumi politiini iliuuseqarnermi pisortaq Jack Nathansen KNR-imut oqarpoq
Politiit atuarfik suleqatigalugu angajoqqaanut meeqqanullumi paasissutissiiniarput.
- Atuarfimmi meeqqat mikinerusut paasititsiviginissaat suliassani tullinnguuppoq. Meeqqat mikinerusut aallunnerusarpagut, tassa sikumut maannakkut avalatsernissap qanoq ulorianartigineranik ilisimatillugit. Aamma allagartaliisaraluarpugut kisiat taakku aserorterneqartaramik, Jack Nathansen oqarpoq.
Angajoqqaat akisussaaffimmik tigusisariaqartut politiit naliliipput. Angajoqqaat tasersuarmi siku suli qajannarmat sikumukassanngitsut oqaluutissavaat.
- Innuttaasut tamarmik paasiniassammassuk tusagassiortut siullertut attaveqarfigisarpagut. Inersimasullu meeqqat sikumit peeqqusassagaat qinnuigissavagut, Jack Nathansen oqarpoq.
Tasersuarmi siku navianarunnaarpat politiit nalunaaruteqarumaartut Jack Nathansenip ilanngullugu oqaatigaa.