VIDEO Qaqortumi pingasunngormat atualertitsipput

Panimi suut ilikkassamaarnerai Tue Kathrine Egedep ima oqaatigaa:

-Nuannarisaqaqaaq kisitsinermut. Taavalu tuluttut oqaatsinik pikkoriffeqarpoq, qallunaatullu annikinnerusumik, Tasersuup Atuarfiani 1.B-mi atualertumut angajoqqaaq taama oqarpoq.

Atualernissarlumi qilanaarineqartaqaaq.

-Qaamaterpassuit pilerinikuugami utaqqisinnaarpiarneq ajorpoq, Tue Kathrine Egede oqarpoq.

Ukiorlu siulleq atualeqqaartut ilinniagassaqassaqaat.

-Kalaallisut, qallunaatut matematik-ilu pingaarnertut. Taava upperisarsiorneq, inuttut ineriartorneq, eqqumiitsuliorneq, ilusilersuineq, taavalu assassorneq timersornerlu, Åse Svenningsen, 1. klassenut ilinniartitsisoq oqarpoq.

Taakkuinnaangillalli.

-Pinngortitalerineq aamma ingerlatissavaat aammalu inuiaqatigiilerineq, Åse Svenningsen oqarpoq.

Atualerlaat meeqqirivimmiinerminni piareersarluarsimanissaat naatsorsuutigineqarpoq.

-Meeqqat mikisunnguupput. Meeqqerivimmiit aatsaat iserput. Meeqqerivimmi imatut piumasaqaateqarpallaangilaq. Soorunami piumasaqaatigaat meeqqat atuarfianiilernissamut piareersarnissaq, Åse Svenningsen oqarpoq.

Atualerlaat aallaqqaataaniit malinnaalluartariaqassapput.

-Atualeqqaarnermiit aamma pingaarnerpaagami malinnaalluarnissaq. Naqinnernik ilinniarneq ingerlanneqartarpoq atualeqqaarnermiit. Taakualu tunaartarineqartarput allanniarnermut allanniarnermullu, Åse Svenningsen oqarpoq.

Atualertitsinerlu malunnartinniarneqartariaqarpoq.

-Kaffillissaagut tamulugassallu. Taava ilaquttagut amerlanerit tikinnikuunginnamik illoqarfimmut neriartussaagut qaniginerpaasat ilagalugit, eqqissiivilluta, Tue Kathrine Egede oqarpoq.

Atualerluni nuannerpa?

- Ijar, Camilla Egede akivoq.