Qaqortumi ornittagaq nutaaq ammarpaat
Julie Allstars aamma Hinnarik pingaarnertut aliikkusersuisuupput Nanu Børnikkut ornittagaliaat Neriusaaq ammarneqarmat.
Ammaanersiorneq pivoq Qaqortumi seqinnarilluni silagissorsuugaa inuppassuillu ornittagartaaq Neriusaaq illoqarfiup pisoqartaaniittoq alakkarpaat.
Ornittagaq sapaatip akunneranut ullut tamaasa ammasassaaq inersimasunik meeqqat oqaloqatigisinnaasaannik sulisoqartuassalluni. Aamma ornittakkami assigiinngitsunik sammisassaqartassaaq.
Nanu Børn aamma Kommune Kujalleq isumaqatigiissusioreerput Neriusaap ukiuni tallimani tulliuttuni ingerlanneqarnissaanik qulakkeerisumik.
Juli Allstars unnugu timersortarfimmi tusarnaartitsissapput aammalu Hinnarik meeqqanut meeqqatullu pissusilinnut allanut aliikkusersuissalluni.