Qaqortumi mittarfissaq aningaasaqarnermut ataatsimiititaliami isumaqatigiinngissutaavoq
Anda Uldumip Demokraatit sinnerlugit Assartuussineq pillugu Isumalioqatigiissitat tassunga atatillugu annertuumik suliaqarsimanerat innersuussutigaa, partiillu mittarfiup sanaartorneqannginnerani misissuisitsisoqaqqinnissaa pisariaqarsorinagu.
-Isumalioqatigiissitat suliaata ersarilluinnartumik takutippaa Narsarsuarmi timmisartunut mittarfik matullugu Qaqortumi timmisartunut suluusalinnut mittarfiliornissaq inuiaqatigiit aningaasarsiornerannut iluaqutaasussaasoq. Taanngitsuussanngilarput kujataani angalasut amerlanersaat aamma Qaqortumukartuusarmata. Akiitsut aningaasaliinissallu pillugit pilersaarummi, 2012-mi Upernaakkut ataatsimiinnermi Naalakkersuisunit saqqummiunneqartumi aamma pingaarnersiuineq ersarippoq. Tassani naqissuserneqarpoq Qaqortumi timmisartunut suluusalinnut mittarfissaq pillugu business case-liortoqassasoq, placering 2, ilanngullugu Narsarsuarmi mittarfimmik matusinissaq, Anda Uldum oqaluttuarpoq.
Demokraatittaaq isumaqarput pingaaruteqartoq sumiiffimmi pissutsinut ilisimasaqarnerpaat Kommune Kujallermi Kommunalbestyrelsi tusarnaarneqartariaqartoq. Kommunalbestyrelsimi amerlanerussuteqarluartut Qaqortumi timmisartunut suluusalinnut mittarfiliornissaq ilalerpaat.
Demokraatittaaq neriuutigaat Aningaasaqarnermut Ataatsimiititaliap nalunaarutaa pissutaalluni Naalakkersuisut 2013-mi upernaakkut ataatsimiinnermi Qaqortumi mittarfik pillugu siunnersuummik saqqummiussinissaannut atatillugu suliaq ingerlasoq kinguarsarneqassanngitsoq. Siusinnerusukkut oqareernittut, Qaqortumi innuttaasut mittarfissaq naammattumik utaqqereerpaat – tamanna Aningaasaqarnermut Ataatsimiititami amerlanerussuteqartut paasisinnaasariaqaraluarpaat, Anda Uldum oqarpoq.