Qaqortumi mittarfiliornerup aningaasarsiorneq ajalusoortissinnaavaa
- Avataaniit toqqaannartrumik timmisaertoqartarunnaarpat kingunerissavaa Kujataata ineriartortinnissaanut tunngavissaarunneq, taama sakkortutigisumik oqarpoq, Jørgen Lund, Kujataani nunaqarfiit pingasut tassaasut Qassiarsuup, Narsarsuup Igalikullu aqutsisuisa siulittaasuat.
Assartuussineq pillugu Isumalioqatigiisitap inassutigaa, Narsarsuup timmisartoqarfia matullugu Qaqortumi mittarfiliortoqassasoq, tamannalu Kommune Kujallermi Borgmesterip Simon Simonsenip nuannaarutigaa.
Assartuussineq pillugu Isumalioqatigiisitap inassuteqarnerminni pingaartutut eqqaavaat, illoqarfiit anginerit tamarmik Narsarsuarmut ungasimmata aammalu inuiaqatigiit aningaasarsiornikkut ingerlanerat eqqarsaatigalugu imminut akilersinnaanerussasoq Qaqortumi mittarfiliortoqarpat. Kujataata ineriartornissaanut tamanna aqqutissiuunneqassasoq Simon Simonsenip aamma eqqaavaa, neriuutigalugulu Qaqortumi mittarfiliortoqassasoq.
Mittarfiliornermut aningaasat 600 million koruunit angullugit atorneqartussaasut naatsorsuutigineqarpoq.
Mittarfimmik mikisumik pilersitsinani mittarfik Narsarsuarmiittoq atuinnaraanni siuarsarlugulu imminut akilersinnaanerusoq, Jørgen Lund isumaqarpoq.
- Narsarsuup mittarfia pigiinnaraanni aningaasat allanut nunatsinniisiinnarlugillu atorneqarsinnaagaluarput, soorlu utoqqaat illuisa nutarternerinut, atuarfiit aserfallassimasut iluarsartuunnerinut, kollegialiornernut aammalu inuussutissarsiornerup siuarsarnissaanut.
Qaqortumi mittarfiliornissaq Naalakkersuisunit attatiinnarneqassappat, taava kujataani innuttaasut oqallinnermikkut kissaatigisariaqarpaat, mittarfimmik angisuumik sanasoqarnissaa.
- Mittarfik siunniunneqarsimappat, taava kujaarmiut isumaqatigiissutigisariaqarparput mittarfimmik angisuumik sanasoqassasoq apeqqutaatinnagu mittarfiup sumiinnissaa.
Taama oqarpoq Jørgen Lund.
Ulloqeqqanut radioaviisikkut oqaatigaarput, Assartuussineq pillugu Isumalioqatigiisitap inassutigigaa, Qaqortumiit Ilulissat tungaanut immakkut inunnik assartuusineq, Umiaq Line-imit ingerlanneqartoq atorunnaassasoq. Maannali oqaatigisinnaavarput, Arctic Umiaq Line-p immakkut angallassiinnarnissaa eqqarssatigalugu Naalakkersuisut sillimmasiisimammata Arctic Umiaq Line-p amigartooruteqarluni ingerlaannarnissaanut.
