Qaqortumi kiguserisut ikiornissaqanngitsut
Nuummi kigutit nakorsaat sulisorineqartut pingasut ikiginarsinnaagaluarput, Qaqortumili ukiup affaa kigutinut nakorsaqanngilaq.
Kigutileritinnermi qillerut amerlanernit orniginartinneqarunanngikkaluartoq Qaqortumi pisariaqartinneqaqaaq, kigutilli nakorsaqanngimmat innuttaasut illoqarfinnut qanitaminnut aallarlutik kigutileritikkiartortariaqartalersimapput. Qaqortumi kigutit nakorsaanut ikiorti Andrea Sørensen ikiuerusukkaluaqisoq oqarpoq, augustimili kigutit nakorsaarussimallutik.
Kigutileritinniartut namminneq aningaasartuutigisaminnik Narsamukanngikkunik Nanortalimmukartariaqarnissaannik innersuunneqartarput.
Kigutaagassaanerusut Narsami suliarineqartarput, qaammatillu marluk ingerlaneranni Qaqortumiit 25-t nakorsiareersimapput.
Qaqortumi kigutit nakorsaannut ikiortit sisamaapput, kigutigissaasorlu ataasiulluni.
Kiguserisut aseruuttoorneqarnersut paasiniarlugit Qaqortumi kigutileriffimmi assilineqartarput, pullattoorpatalu napparsimavimmut innersuunneqartarput, tassani pencillinamik katsorsarneqartarlutik. Ajornerugaangata illoqarfinnut taaneqartunut innersuunneqartarput.
