VIDEO Qaqortumi inuusuttut pikkorissartut
Inuusuttuaraagaanni suliffissaqarniarneq ajornakusoorluinnarpoq. Suliffissatigummi periarfissarpassuunngillat.
- Suliffissaaleqinaqaaq. Suliffissarsiortaraluarpunga sianertoqarneq ajorami, 19-inik ukiulik Joorsi Tellesen KNR-imut oqarpoq.
Qaqortumiinnaanngitsoq, nunatta sinnerani aamma pissutsit allassuteqanngimmata, ukioq manna inuusuttuaqqanik siullermik Kommuneqarfik Sermersuumi pikkorissartitsinerit ingerlanneqartalerput.
- Nuummi suliffeqarfeerannguaq siunnersuisarfik ingerlapparput suliffissaaleqisut pikkorissarlugit, taava tassani Kommunerujussuit suleqatigivagut, pingaarnertullu aningaasaliisuupput Namminersorlutik Oqartussat. Pingasoqiusallutik pikkorissaaneq ingerlapparput, massakkut maani kujataani Kommuni Kujalleq suleqatigalugu, maani massakkut Qaqortumi inuusuttunik aallussivugut, Kristine Sigurdsen KNR-imut oqarpoq.
Inuusuttuaqqat ingerlariaqqinnissaminnut aamma aqqutissiuunneqarusupput.
- Siunertarivarput inuusuttut uninngannginnissaat, unittooqqasut aallarteqqinnissaat, minnerunngitsumillu aamma ilinniaqqiffissanik assigiinngitsunut pulasinaagunik pulanissaat. Periarfissat nutaat, aamma inuttut akisussaaneq aamma minnerunngitsumik aalluttarparput taassuma iluani, Kristine Sigurdsen oqarpoq.
Qaqortumi inuusuttuaqqat pikkorissartinneqartut aqqaniliusut ilinniarfimmut suliffeqarfimmulluunniit ingerlariaqqinnissaminnut neriuuteqarput.