Qaqortumi innuttaasut: Naalakkersuisoq kiffartuussisorluuniit
Taaguutip naalakkersuisup kiffartuussisunngortinnissaanut aalajangiiffissatut siunnersuut Inatsisartut ukiakkut ataatsimiinneranni oqallisigineqassaaq.
Suleqatigiissitsisunit, Inatsisartunut ilaasortap, Tillie Martinussenip taaguut kiffartuussisoq naleqqunnerusoraa. Taassuma siunnersuut siunnersuutigaa.
Siunnersuuteqarnermi Naalakkersuisunut ilaasortat taaguutaat allanngortinniarneqarpoq.
AAMMA ATUARUK Tillie Martinussen: Taaguut Naalakkersuisoq kiffartuussisumik taarserli
Assersuutigalugu aningaasaqarnermut naalakkersuisoq, Vittus Qujaukitsoq (NQ) aningaasaqarnermut kiffartuussisunngortinneqassaaq imaluunniit Anna Wangenheim (D) peqqinnissamut kiffartuussisunngussaaq, Karl Frecderik Danielsenilu (Siumut) ineqarnermut attaveqatigiinnermullu kiffartuussisunngorluni.
Kiffartuussisoq naleqqunnerusoq
Qaqortumi innuttaasut ilaat siunnersuummut isummereerput.
Jokum Stork Isaksenip suliffissarsiortuusup siunnersuut isumaqatigilluinnarpaa:
- Uanga naalakkersuisoq tulluartinnerpaarpaavara, taanna taaguut. Isumaqarpunga Tillie Martinussen ajunngitsorujussuarmik eqqarsarsimasoq.
Soraarneq, Stine Stach Lundblad siunnersuummut ersarissumik isumaqarpoq:
- Uanga kiffartuussisoq torragineruvara, naalakkersuisoq taama tulluaattartigisoq qulangeerpasittutut ittarami.
- Naqisimannittutut pinngikkaluarlutik tulluarsorinngilara naalakkersuisoq. Kiffartuussisoq inuiaqatigiinnut kiffartuussiguni tulluarnerutippara.
Kiffartuussisoq allatorluinnaq isumaqartoq
Innuttaasulli allap kiffartuussisoq naleqqutinngissoraa.
Kommunimi pedelip, Vittuaraq Isbosethsenip taakku marluk isumaqatigiinngilai.
- Kiffartuussisarpugut inoqatitsinnut. Kiffartuussisoq allarujussuartut isumaqartippara, soorlu kiffartuussisarpugut inuiaqatitsinnut, kisianni naalakkersuinermut tunngatillugu kiffartuussisumik taagorneqarnissaa isumaqatiginngilara.
- Naqisimanninnermik uanga tunngassuteqartinngilara naalakkersuisuuneq, kiffartuussinerup inuiaqatigiinnut atorneqarnissaa oqaatigisareerpara.
Politikkikkut qulartoqartoq
Tillie Martinussenip siunnersuutaa politikerit KNR-ip oqaloqatisaasa akornanni politikkikkut tapersingaanngilaat.
- Taaguut allanngortinneqassaguni innuttaasut aalajangiinissaminnut pisinnaatinneqassapput. Isumaqarpunga sammisaq pillugu qaammarsaasoqaqqaartariaqartoq, Inuit Ataqatigiit siulittaasuata tullia, Aqqaluaq B. Egede oqarpoq.
Siumulli siunnersuut tapersernianngilaa. Tamanna siulittaasup tulliata, Karl-Kristian Krusep KNR-imut oqaatigaa.
Oqaaseq kiffartuussisoq naalagaaffeqatigiinnut, Suleqatigiissitsisut illersugaannut, atatillugu eqqarsaatigigaanni tulluanngitsutut nipeqartoq, Karl-Kristian Kruse isumaqarpoq.
Taaguutip naalakkersuisup kiffartuussisunngortinneqarnissaanut siunnersuut ukiakkut ataatsimiinnermi novembarip ulluisa 24-anni aatsaat oqallisigineqassaaq, taamaammat Inatsisartuni ilaasortat siunnersuut pillugu suli eqqarsarluarnissaminnut periarfissaqarput.
Ukiakkut ataatsimiinneq septembarip ulluisa 25-anni aallartissaaq.
