Qaqortumi eqalussuarujussuaq
Pinngortitaleriffik inniminniisimavoq eqalussuarmik misissugassamik pisaqaqqusilluni. Tamannalu mikinaarnagu naammassineqarpoq. Eqalussuaq 5-6 meterisut angitigisoq ningittakkat qarsaasa ilaannut kiisisimavoq.
Aalisartut Jens "Ala" Semsen Saarlumeersoq aamma Kunuk Jakobsen Eqalungaarsunneersoq pisaqartuupput.
- Qangali ilisimavarput Qaqortup eqqaa eqalussuaqartoq ningittakkanik pisaqartoqartarmat. Kisianni aatsaat taama angitigisumik takuvunga, Kunuk Jakobsen KNR-imut oqaluttuarpoq.
Ningittakkat sipilimik amuarneqarput eqalussuarlu allatut ajornarmat Qaqortup umiarsualivianut kalinneqarpoq tassanilu truckinit umiarsualiviup qaanut amuneqarluni.
Eqalussuaq pisarineqarpoq ilisimatuunit misissugassatut.