Qaqortumi danskisut oqaasillit aniapput

Kalaallit oqaasii pillugit Namminersornermi inatsisissatut siunnersuut Qaqortumi innuttaasunut ataatsimiititsissutigineqarmat qallunaat aamma takkukkaluartut, oqallinneq kalaallisuinnaq ingerlanneqarpoq.

Oqaatsit pillugu oqallinnissamut Kultureqarnermut Naalakkersuisup Mimi Karlsenip Qaqortumi innuttaasut kalaallisut qallunaatullu oqaasillit oqalliseqataajartoqqullugit marsip 18-ni qaaqquai, unnulli kalaallisuinnaq ingerlasariaqarsimavoq.

Naalakkersuisoq Qaqortumut tikinnissani sioqqullugu Kommune Kujallermut allakkatigut saaffiginnippoq, nutserisumik piareersititseqqullugit, tamannali isumagineqarsimanngitsoq ataatsimiiffissamut iseramik aatsaat paasivaa. Taamaammat ataatsimiinneq aallartimmat qallunaanut nassuiaavoq apeqqutissaqaraangata akisarsinnaallugit. Allatut ajornartumik aamma nutserisumik pisariaqartitsigunik sanilitik nutserinissamut isumalluutigeqqullugit oqarfigisimavai. Taama pisoqariarmat qallunaatut oqaasillit aniallutik aallartissimapput.

Mimi Karlsenip qallunaatut nassuiaanini kalaallisut oqaasilinnut erseqqissaatigisimanngimmagu kalaallit isumaqalersimagaluarput qallunaat aniatinneqartut.

Kommune Kujallermi Allattoqarfiup pisortaata Kim Dahlip maanna nassuerutigaa, Kultureqarnermi Naalakkersuisoqarfiup allakkatigut saaffiginissutaa tamaat atuarsimanagu, taamaammallu kommuni nutserisumik piareersimatitsinngitsoorsimasoq.

- Pisoq pillugu ajuusaarpunga, Kim Dahl oqarpoq.