Qaqortumi atuarfiup pisortaata inigisalunneq pillugu atorfini qimakkaa
Tasersuup atuarfiata pisortaa Bettina Abelsen Hansen ukioq ataaseq sinnilaarlugu pisortaareerluni atorfimminiit soraaginnartariaqalerpoq.
- Najugarisatta toqqissisimanannginnera pissutaanerpaavoq. Aputeqaleraangat appussaarujussuartarami illu equtiterluni.
Pisortap tullersortaa, Susanne Andersen aamma naammaginartumik inissaqartitaannginami ukiuni pingasuni sulereerlunisoraaginnartariaqalerpoq.
Atuarfiup pisortaa Bettina Abelsen Hansen naapertorlugu ajornartorsiutaasoq atuarfiup aqutsisuisa kisimik ajornartorsiutiginngilaat.
- Ilinniartitsisut tamarmik eqqarsaatigigaanni najugaritinneqartut ilinniartitsisunut naammaginanngeqigamik, Bettina Abelsen oqarpoq.
Atuarfiup pisortaasa marluullutik atorfitsik tigummiinnarusukkaluarpaat, inigisaminnilli ajornartorsiuteqarnertik pissutigalugu tigummiinnarsinnaanatigit.
- Saaffiginninnikuuvunga ikioqqullunga maaniiginnarsusukkuluarluta. Suliffipput nuannarigatsigu ingerlaanarusukkaluarama aamma. Maaniiginnarusulluta illut assigiingitsut sisamat attartornikuuagut, Susanne Andersen oqarpoq.
Kommunip ajornartorsiut isumaqartigaa
Qaqortumi inissiarpassuit pisoqaasut oqummik eqqugaaqqapput, nutaanillu sanaartortoqanngimmat inissanik naleqquttunik nassaarniarneq ilungersuutaavoq.
- Ukiuni kingullerni ilinniartitsisunik atorfinitsitsigaangatta inissarsiuussisarnerput ilungersunarsigaluttuinnartutut oqaatigineqartariaqarpoq, Jens Korneliussen oqarpoq.
Tamanna atorfinitsitsiniarnermut aamma ilungersunarpoq.
- Atorfinitsitsisarnitsinni ilaatigut kipiluttunarsisarami pitsaasumik inissamik neqeroorutissaqanngikaangatta ilinniartitsisutsinnut, Jens Korneliussen oqarpoq.
Kommune Kujallermili inissianik nutaanik sanaartortoqaqqilernissaa anguniarlugu kommune kujalleq ukioq una naatinnagu inissiaatileqatigiiffimmik pilersitsissalluni pilersaaruteqarpoq.