Qaqortumi asbesteqarnera: Najugaqartut iluarsartuussinermi pujoralammut annilaangasut
Qoqortumi Blok H-p eqqaani allagartanik qanilleqqusaannginermik allaqqasunik nivinngaasoqarsimavoq, PCB-eqarlunilu asbesteqarmat.
Inissiami najugaqartut nuutsinneqaratik najugaqartinneqaannarnertik toqqissisimanartinngilaat.
"Iserneq inerteqqutaavoq" aamma "Asbestip najuussornera peqqissutsimut uloriarnarpoq".
Taama inissiat quleriit tallimaasut iluarsartuunneqartup allagartat eqqaanniitut qaqortunik, sungaartunik aamma aappaluaartumik qalipaatilinnik allannillit nivigarneqarsimapput.
Taakkua inissiaqarfimmut qanillattunnginnissamik oqariartuuteqarput. Sulisullu pujoralammut imminnut illersorniarlutik kiinappaqarlutillu atikkersorsimapput.
Najugaqartut ilaata sooq utaqqiisaasumik inissaminnik tunineqarsimannginnertik paasisinnaanngilaa.
-Allamut nuutsitaanngilagut, iliuuseqarfigineqanngilagut uagut, Blok H-imi najugalik Mariane Filemonsen oqarpoq.
Qaqortumi Blok H nutarterneqartoq.
Najugaqartut inissiani iluarsartuunneqarneq pujoralannarmat, unnuiffissaminnik ujarlersimagaluarput.
-Unnuiffissarsioraluarpugut, kisiat iluatsitsinngilagut. INI A/S-imiit tunineqanngilagut, ilaquttatsinnukaannarsinaanginnatta, inoqutigiit tallimaagatta, Mariane Filemonsen qarpoq. Taassuma pujoralaqarnera malugisimavaa.
AAMMA ATUARUK Pisortat inaataani najugaqartut iluarsartuussinissamut utaqqisariaqarput
-Suliarineqalermata panertoornersuaq, altanimiit pujoralak isaasoq, niaqorlunneq, ulloq taanna malugilerpagut, toqqissisimananngitsorujussuullunilu. Ingammik kanani allagartaqartoq takoreerlugu, asbestimik piiaasunngooq, ulorianartuusoq nalunatigu, tassanilu ineqartinneqaannarluta, Mariane Filemonsen oqarpoq.
Taamaammat utaqqiisaarutaasumik najugarisinnaasaminnik ilaqutariit kissaateqarput.
Annilaagassutissaqanngilaq
Pujoralannik milluaasoqarmat ernumassutissaqanngitsoq, INI A/S-imi sullitanut pisortaq Mogens Fontain oqarpoq.
- Milluaaneq inissiap iluanut ingerlalersimagaluarpoq, taannalu soorunami pilersaarutaanngilaq. Taanna kukkuluttorneruvoq akueriuminaatsoq,INI A/S-imi sullitanut pisortaq Mogens Fontain oqarpoq.
-Annilaangassutissaqanngillat. Nakkutilliisoqarpugut, nakkutilliisut taakkua qulakkeerpaat suliaq eqqortumik suliarineqarnersoq. Tassa imaappoq; inissiat tungaannut matuneqartussat matuneqarnissaat, tassa avatangiisinut mingutsitsisinnaanerat pillugu aamma taakkua matuneqarnissaat, Mogens Fontain oqarpoq.
Kukkuluttortoqarneratigulli Mariane Filemonsen-ikkut inigisaannut pujoralatsitsisoqarsimanera INI A/S-imeersut aamma uppernarsarpaat.
- Milluaaneq inissiap iluanut ingerlalersimagaluarpoq, taannalu soorunami pilersaarutaanngilaq. Taanna kukkuluttorneruvoq akueriuminaatsoq, taamaammat paasisaqareeratta taamaattoqartoq, ippassaq ullaarnganiit ataatsimeeqattaalerpugut ulloq naallugu sammeqattaarlutigu, taanna tallimanngormat taama oqarpoq.
Ajornartorsiulli aaqqinneqareersoq INI A/S-imiit isumaqartut, Mogens Fontain erseqqissaatigaa.
Illorsuaq iluarsartuunneqartoq 21-inik inissiaqarpoq, iluarsartuunneqarneralu aallartinneqareerpoq, ukiunillu marlunnik sivisussusilimmik iluarsartuunneqassaaq.
