Qaqortumi angut 18-nik ukiulik savimmik kapineqarpoq
Inissiami ernguttoqarfiusumi isumaqatigiinngitsoqarpoq kamaannerlu pilerluni, tamatuma kingorna inissiap silaataani kamaaneq nanginneqarpoq tassanilu angut 18-nik ukiulik savimmik kapineqarluni, Kujataata politeeqarfiani pisortaq Bent Ole Kleist oqarpoq.
Angut savimmik kapisisoq politiinit tigusarineqarpoq Qaqortumilu eqqartuussivimmut aqagu ullup qeqqata siorna sassartinneqassalluni.
Angut alla 18-it missaannik ukiulik aamma napparsimavimmut unitsinneqarpoq kamaattoqarneratigut peqqarniitsumik persuttarneqarnerata kingorna,
- Tallimanngornerup unnukkuani ulapippugut angerlarsimaffinni taamatullu imerniartarfinni eqqissiviilliortoqarneratigut, Bent Ole Kleist oqarpoq.
Taakkua saniatigut Qaqortumi politeeqarfik ullaaq nalunaarfigineqarpoq, umiatsiaaraq nunaqarfiup Eqalugaarsuit eqqaanni kivingajaqqasoq takuneqarsimasoq.
Umiatsiaq nammatakkamik taamaallaat imaqarsimavoq. Politiit helikopteri atorlugu ujaasineq piareersarittoraallu, Eqalugaarsummit Qaqoqartumi politiit nalunaarfigineqarput, umiatsiap inuttaa angut annassimasoq, pisuinnarlunilu Eqalugaarsunnukarsimasoq.
Angut taanna umiatsiamik Alluitsup paanit Qaqortumut ingerlaarsimagaluarpoq, iluliaminermullu aporsimagunarluni nunamut taliinnartariaqarsimalluni.
Helikopterimik ujaasinissaq qujanartumik taamaatinneqarpoq, kujataani politeeqarfimmi pisortaq Bent Ole Kleist oqaluttuarpoq, taanna neriuuteqarpoq sapaatip akunnerata naanerata sinnera eqqissisimasumik ingerlanneqarumaartoq.