Qaqortumi angajoqqaat ernumapput
Qaqortumi Tasersuup atuarfiani 6.a-mi atuartut angajoqqaavi ilinniarsimanngitsuinnarnik meeqqamik ilinniartitsisoqartinneqarnerat naammaginagu atuarfiup pisortaanut atuarfiullu siulersuisuinut saaffiginnittaraluarnitik iliuuseqarfigineqanngimmata, meeqqamik siunissaannut ernumassuteqalerput.
Qaqortumi Tasersuup atuarfiani 6.klassimi atuartut ukiuni atuarfiusuni siullerni tallimani ataasiinnaarmik ilinniarsimasumik ilinniartitsisoqarsimapput, taannali upernaaq aallarmat, ukioq atuarfiusoq 2005- 2006 atuartut ilinniarsimasunik ilinniartitsisoqartinneqarnissaat atuarfiup pisortaanit neriorsuutigineqaraluartoq piviusunngortinneqarsimanngilaq.
Angajoqqaat meeqqamik atuartinneqarnerannik naammagisimaarinninnginnamik atuarfiup siulersuisuinut saaffiginnissuteqarsimapput meeqqamik ilinniarsimasunik ilinniartitsisoqartinneqanginnerat maalaarutigalugu.
Angajoqqaat atuarfiup siulersuisuinut saaffiginnikkaluarput, tamannalu iliuuseqarfigineqassasoq neriorsuutigineqaraluarpoq, kinguneqanngimmalli kingumut allagaqaqqipput.
Atuarfiup pisortaa Gerhard Egede kingusinaaqaluni akissummini ilaatigut allappoq meeqqat ilinniarsimasunik ilinniartitsisussaqartinneqarnissaat neriorsuutigineqarsimanngisaannartoq. Akissulli angajoqqaat naammaginngilaat.
- Ernumassutigaarput meeqqatta ilinniarsimangitsunik ilinniartitsisoqartinneqarnerat atuagarsornikkut kinguaattoornerannik kinguneqartoq, ernumassutigaarpullu meeqqatta siunissami qaffasinnerusumik ilinniagaqalerisinnaanissaminnut mattunneqarsinnaanerat, Nauja Ottosen aamma Peter Assersen Tasersuup Atuarfiani 6.a- mi atuartut angajoqqaavi sinnerlugit allapput.
