Qaqortumi aalakoorluni biilertoq apuisoq: Arnap niuni napivaa
Qaqortumi arnaq sapaatiummat ullaassakkut aalakoorluni biilertumit aportinnermini ajoqusingaatsiarpoq, ilaatigut niuni napillugu. Kujataani Politiit taama ilisimatitsipput.
Allattoq Simon Uldum -
septembarip 13-at 2016 09:12
Kujataani Politiit, Qaqortumi immikkoortortaqarfik, sapaatiummat septembarip aqqarnani ullaassakkut nal. 4.40 missaani kalerrinneqarput arnaq Qaqortumi biilinit aportissimasoq.
Arnaq napparsimmaviliaanneqarpoq, tassanilu paasineqarpoq ajoqusingaatsiarsimasoq, ilaatigut niumi illua napisimallugu.
Biilimik ingerlatsisoq apuinermi kingorna ingerlaannarsimavoq sivitsunngitsorli politiinit tigusarineqarluni. Imigassartorsimanera tigusarinninnermi paasineqarpoq.
Kujataani Politiini politikommissæriugallartup Sivalerak Terkilsenip ilisimatitsissutigaa biilimik ingerlatsisoq eqqartuussivitsigut suliassanngortinneqassasoq.
