Qaqortormiut uuliakoortoqarneranit tipimiuutitaapput

maajip 29-at 2006 10:09

Qaqortup umiarsualiviani sakkortuumik tipeqarpoq. Angallat aalajangersimasoq uuliasunnilluni tipeqangaarmat politiit, qatserisartut kommunimilu teknikkimut ataatsimiititaliami siulittaasoq ullut tamaasa innutaasunik naammagittaalliorfigineqartarput.

-Umiarsualivitta ilua ungasinngitsukkut uuliakoorneqalerpoq tipittorujussuarmik. Sissaq, sunalu tamarmi tippattarpoq. Ippassaq ullaap tungaani aamma taamaariarmat qatserisartut umiarsuarmilu oqartussaasut attaveqarfigivakka, taakkulu tamarmik politiinut saaffiginneqqusipput, Aqqalukasik Kanuthsen Qaqortup kommuniani teknikkimut ataatsimiititaliami siulittaasoq taama oqarpoq.

Politiinut saaffiginnikkami politiit misissugassaq misissorpaat uuliakoornerli suminngaanniit pisimanersoq oqaatigineqarsinnaanngimmat suliaq ingerlateqqinneqarsinnaanngilaq. Pasitsaanneqarporli siorartaat savalimmiuneersoq ”Christine” uuliakoortuusoq. Misissuinerli unitsinneqanngilaq.

-Siorartaatip nunatsinni akuersissummik imaluunniit nunarsuarmi angalasinnaanera tamakkiisumik peqarnersoq paasiniagassama tulleraat. Akuersissuteqarunilu tassa sulisinnaassaaq, tassami siorarniutaalluni pivoq, Aqqalukasik Kanuthsen oqarpoq. Qatserisartut tallimanngormat unnukkut uuliakoortoqarneranik nalunaarfigineqaramik angallat 1.000 literit missaannik umiarsualivimmut uuliakoorsimavoq. Uuliamik piiaaneq aatsaat aqaguani ullup qeqqata missaani naammassineqarpoq.

Umiarsuarnik nakkutilliisoq Hans Fleischer Søfartsstyrelse-minngaanneersoq oqarpoq, umiarsuit nunatsinneersut Danmarkiminngaanneersulluunniit kisimik misissorneqartartut. Politiinilli innuttaasunilluunniit saaffigineqarunik umiarsuit nunanit allaneersut aamma misissorsinnaasarpaat.