VIDEO Qaqortormiut tv-kkut isiginnaagassaaleqinngillat
Nuuk TV Qaqortumi immikkoortortaqarfeqalermat ulluni makkunani misileraalluni aallakaatitsinerit Qaqortormiut alutorsaatigaat.
- Isiginnaartorujussuuakka, ingammik timersortut, tv-mik isiginnaartartoq, Josva Olsen KNR-imut oqarpoq.
- Ilaanna alutornaqaat, tv-mik isiginnaartartoq, Othilie Olsen KNR-imut oqarpoq.
Massakkut aallakaatitsivimmiit misileraalluni aallakaatitsisoqarpoq.
- Massakkut misileraanerput naammassiartuaalerpoq. Isumaqarpungalu iluatsilluartoq, Nuuk TV-mi teknikkimut pisortaq, Angu Kristensen KNR-imut oqarpoq.
Massakut isiginnaarneqarsinnaasut tamarmik aallakaatinneqartut septemberip aallaqqaataaniit ilaasortat kisimik isiginnaarsinnaalissavaat.
- Septemberip aallaqqaataaniit akorngusersorneqalissapput. Tassa imaapoq, maanakkuugallartiq akeqanngitsumik inuit isiginnaarsinnaavaat, kanalit taakua aallakaatitassagut, Angu Kristensen oqarpoq.
Filminillu soqutigisallit septemberip qaammataa ilanngullugu akiliingikkaluarlutik aallakaatitat isiginnaarsinnaagallassavaat.
- Pakkit marluk, tassa grundpakke aamma filmpakke taakua siullermeerutaasumik aallakaatinneqarallassapput. Kisiat aamma una akeqanngitsumik septemberi naallugu filmkanalit isiginnaarneqarsinnaasapput, Angu Kristensen oqarpoq.
Qaqortoq Digitalimi ilaasortanngortut maannamut 200-it sinneqalereersimapput, sulilu amerlanerit ilaasortanngornissaat naatsorsuutigineqarpoq.
Qaqortoq Digitalimut ilaasortaaniarlutik nalunaarsimasut ilaasortanngorusuttullu Sulisartut Højskoleanni Nuuk TV-mit tallimanngorpamiit marlunngorpat tungaanut naapinneqarsinnaassapput.