Qaqortormiut qulimiguulimmik angallassisoqarnissaa ataatsimoorfigaat
Kommune Kujallermi kommunalbestyrelsimut ilaasortat borgmesterillu tullia Simon Simonsen ingerlaaqatigiinnermut peqataapput, taakkulu pilersaarutigineqartut innuttaasunut nassuiaateqarfigimmatigik, akerliussutsimik takutitsisut eqqissisimasunik avissaarput.
Qaqortumimi qulimiguulimmik kiffartuussinerup ukiortaami ingerlaannarnissaa borgmesterip tulliata naqissuserpaa.
- Paasissutissat pissarsiarisagut naapertorlugit, Naalakkersuisut anguniagaat tassaavoq angallannerup 75 procentia qulimiguulimmik ingerlanneqassasoq 25 procentialu imaatigut ingerlanneqassalluni, tamannalumi Kujataani kissaatigisatsinnut naapertuulluinnarpoq.
AAMMA ATUARUK Jørgen Wæver: Air Greenlandip sulisuni sallunaveeqqutitut atorpai
- Mittarfeqarfiit aamma nalunaarutigaat mittarfiit matuneqarnissaat anguniagaanngitsoq, angallannerup 75 procentia qulimiguulinnik ingerlanneqartussaammat. Taamaammat Air Greenland angallannikkut kiffartuussinissamik isumaqatigiissuteqarfigineqanngikkaluarpalluunniit mittarfiit matuneqassanngillat, Simon Simonsen akerliussutsimik takutitsisunut taama oqarpoq.
Soraarsitaasimasut neriuutissaqarput
Air Greenlandimi sulisunut soraarsitaasimasunut tunngatillugu, taakku mittarfinni pisariaqartinneqaannarnissaat kommunip neriuutigaa, allammi suliassamut tassunga sulisunik misilittagalinnik aamma pisariaqartitsissammata.
AAMMA ATUARUK Air Greenland: Soriarsinnaanngilagut
Kujataani angallannermi pissutsit aammalu soraarsitaasut pillugit kommunip isummersuutai tusareerlugit akueralugillu akerliussutsimik takutitsisut avissaarput.
Kujataani angallannerup aaqqissuussaanera pillugu isumaqatigiinniarnernut peqataatinneqarnissani Kommune Kujalliup kissaatigisimagaluarpaa, peqataatinneqarsimananili.