Qaqortormiut piareersarput

Naak ukiut tamaasa Qaqortumi aqquserngit killingisa ilaanni ivikkat killorneqartaraluartut, aqagu quliniit kunngikkusiornissaq pillugu aamma ivikkanik kusassaasoqarpoq. Qaqortormiutoqaq Elias Hansen Kunngikkut tikinnissaanut qilanaartunut ilaavoq.

- Ulluni kingullerni sinerissami pisut radioaviisimi ilanngutassiarineqartartut nuannareqaakka. Aamma ullaaq Sermitsiami takusara  Uummannami niviarsiarannguup Dronningi naasunik tunigaa takugakku qiangajappungaluunniit, Elias Hansen oqarpoq.

Kunngikkormiut nunatsinnut tikeraarnerat atorluarlugu, nunani tamalaanni tusagassiortut Qaqortumiinissaat, illoqarfimmut nittarsaasilluarnermik kinguneqarnissaa Qaqortumi takornariaqarnermut pisortap Edda Lyberthip ilimagaa.

- Uanga illoqarfimmi takornariaqarnermut pisortatut pingaartippara, Kunngikkormiut tikinnerat iluatsillugu, Qaqortup tusagassiuutitigut nittarsaalluarneqarnissaa. Taamaalilluni nunarsuarmioqatitta takusinnaanniassagamikku Qaqortup qanoq nuannertiginera, Edda Lyberth oqarpoq.

Kunngikkormiut aqagu Hotel Qaqortumi ulloqeqqasiussapput. Dronningip pujortartarnera Hotelimi pisortap eqqarsaatigilluarsimanerarpaa.

- Nuannersunut ilaavoq, Dronning-ip pujortartarnera ataqqiniarlugu eqqarsaatigisimagatsigu . Ullormi tassani Namminersorlutik Oqartussat pujortartarnermut inatsisaat atuutinniarnagu aalajangersimavugut. Dronningi ineeqqami pujortartarfissaanik qasuersaarfissaanilu piareersaasimavugut. Taava eqqissisimaareeruni, neriartussaaq Hotel Qaqortumi pisortaq Jim Riis oqarpoq.

Qaqortormiutoqqap Elias Hansenip, nalunngilluinnarpaa illoqarfini Qaqortoq kunngikkormiunit nuannarineqartoq.

- Qaqortoq nunatsinni kisiartaalluni illoqarfiup qeqqani tissaluttoqarpoq. Aamma oqaluffitoqaq eqqaanilu kuuk Kunngikkormiut isiginnaasagaat ilimagilluinnarpara, Elias Hansen naggasiivoq.