Qaqortoq sukkaniuttarfittaarpoq
Pilersitsisorlu isumassarsiamut suna tunngaviunersoq KNR-imut ima oqaluttuaraa:
- Kommune kiisalu aningaasaliisartut allat ikiortigalugit, biileeqqat sukkaniutit atorlugit sukkanniuttarfimmik sanavugut crosscart-ertarfimmik. Qujanartumik Kommunimiit suliffeqarfinniillu assut aningaasaliinissaq annertuumik soqutigineqarsimavoq. Taamaalilluta nukappiaqqat isaasalerlugu naalanngitsut allanik suffissaqanngitsut, illoqarfimmilu aserorterniakujunnermik, tusaamaneqartut pinaveersaartitsineq anguniarlugu tassani sulisorilerpavut. Nukappiaqqat taakku arfinillit, sukkaniuttarfik ajunngitsuunissaa isumagissavaat, biilinillu iluarsaasisassallutik, Jim Riis oqarpoq.
Jim Riis illoqarfimmi inuusuttuaqqanik nalungisaqartunik ikiorteqarluni, nukappiaqqanik naalanngitsunik sulisussaminik nassaarpoq. Inuusuttuaqqanik taakkuninnga, toqqaasimanini ima oqaluttuaraa.
- Uku inuusuttuaqqat naalanngitsut sulisorineqarnissaannut aalajangerninnut marluiit tunngaviupput. Tassa ukuusut, inuusuttuaqqat akisussaassusermik tunineqarnermikkut aserorteriniakujukkunnaassapput. Aappaattut perorsarneqartutut misigilissapput, taamaalillutik imminut paarinerulissallutik, Jim Riis nassuiaavoq.
Kinaluunniit, killissaminik oqaluttuunneqanngikkuni naalanngitsunngorsinnaasoq Jim Riisip nalunngilluarpaa.
- Nammineq nukappiaqqatuulli taakkutulli inuusuttuaraanikuuvunga. Taamaammat nalunngilara, inuusuttuaraq taamak ukiulik aallamasuusartoq. Aallamasuunitta nalaani sulerissalluta nalugutsigu, ajortuliornissaminut qaninnerulersarpugut. Taamaammat inuusuttuaqqap killissani naluguniuk sumiinersoq oqaluttuuneqarnanilu, inuusuttuaraq naalanngitsunngorsinnaavoq. Tamanna pinaveersaarniarlugu, peqatigiiffipput nutaaq aallartipparput, Jim Riis naggasiivoq.
Biileeqqanik aquutigaluni sukkaniuttarfissaq, tassa crosscartertarfissaq pingasunngorpat Prins Henrimmit ammarneqassasoq, Qaqortumi Hotelimi piginnittumit Jim Riisimit oqaatigineqarpoq.
