Qaqortoq pimoorullugu suliniarfigineqalerpoq
Kujataata inuussutissarsiornikkut pilersaarusiorneqarnissaa, Namminersornerullutik Oqartussanit suliassanik oqartussaaffinnillu nussuinissaq kiisalu ilinniartitaanikkut piginnaanngorsarnikkullu inerisaanermi kujataani qitiusutut inissinnissaq, Qaqortup Kommuneata sulissutigisassaa maanna ilagaat.
Taakkulu inuussutissarsiornermi aaqqissuussinermi nutaami periaasissanut pilersaarummi tamanut ippassaq saqqummiunneqartumi ilaatigut atuarneqarsinnaapput.
Periaasissanut pilersaarutit Inuussutissarsiornermut, Sulisoqarnermut Nunalerinermullu Pisortaqarfimmit, Qaqortumi Inuussutissarsiornikkut Oqallittarfimmit kiisalu Qaqortup Kommunianit ataatsimoorullugit upernaaq aallartittumik suliarineqalersimapput.
Kommunip qularutiginngilaa ataatsimoorussilluni pilersaarusiornerup kommunimit kisimiilluni suliarineqarsimanerannit naleqqiullugu suliamut tunniusimaneruneq kiisalu periaasissanut pilersaarutinik pilersitsisuunermik misigisimaneruneq kingunerissagai.
Kujataani kommunit decembarip 14-ianit 19-iat ilanngullugu ataatsimiissapput.
