Qaqorteqqasut akii qaffapiloorput

Sumiiffinni assigiinngitsuni nerisassarsisinnaajunnaarsinnaanermut aarlerineq uivernernermut saatinneqaqqajaalerpoq.

Filipiinerit illoqarfiisa pingaarnersaanni, Manilami, qaqorteqqasussaaleqineq pissutigalugu ilaqutariiaat amikkittoortalerput.

Nunani piitsuunerusuni allani aamma akit qaffakkiartornerisa kingunerannik uuliamik nerisassiuummik, immummik, majsinik, qaqorteqqasunik neqinillu amigaateqartut amerliartuinnarput.

Afrikap kitaani naalagaaffinni Bukina Fasumi Senegalimi, Camerounimi, Cöte d´lvoire-milu akerliussutsimik takutitsisoqarpoq, ilaatigut inuit inuunerinik akeqartumik.

Haitimi tallimanngormat nerisassat akitsornerujussuannut akerliussutsimik takutitsineqarmat inuit pingasut toqutaapput, Igitsinimilu ippassaq akerliussutsimik takutitsisut pisiniarfinnik ikuallatsitseqattaarlutik.

Nunarsuatsinni inuit amerliartupiloornerujussuat, silap pissusaata allanngoriartornera naasorissaasullu naatitamik ikummatissanngorlugit tuniserusunnerulernerisa nerisassat akii qaffakkiartortipiloorpaat. Taakkua saniatigut, qaqorteqqasunik naatitsisartut soorlu Indiami, Vietnamimi Kinamilu nunaminni amikkittoornissartik aarlerigalugu nunanut allanut tuniniaaneq unitsippaat.

Nunani assigiinngitsuni nerisassanik pisiassaqaraluarpoq, taakkuali ima akisutigaat allaat inuinnarnit akissaqartinneqaratik.