Qaqiffimmut utaqqisut suli amerlanerupput

Qaqiffimmi katsorsartinniarlutik utaqqisut kommuneqarfinni najugaqartut arlaqarput. Katsorsartinniartunut utaqqititsisariaqartarnermut kommunit aningaasaqarniarnermikkut killeqartarnerat pissutaasarpoq. Ilulissat kommunianni Qaqiffinniarlutik utaqqisut massakkut 45-pput, ilaqutariinnullu katsorsartinniarlutik utaqqisut 105-iullutik. Taama utaqqisoqartariaqarnera assigiinngitsunik pissuteqartoq Ilulissat kommuneani isumaginninnermut pisortaq Makka Fencker oqarpoq:

- Ilulissani ukiuni kingullerni arlalinngulersuni katsorsartittarneq ingerlanneqarpoq, minnerunngitsumik Qaqiffiup maani aamma illoqarnera pissutigalugu. Taamaammat utaqqisugut taama amerlatigipput.

Utaqqisut ilaat sivusuumik ilaallu sivikinnerusumik utaqqisarput, katsorsartikkumasullu tamaasa assigiimmik perusukkaluarlugit ilaqutariinni meerartalinneersut salliutinneqartarput.

Katsorsaanermut aningaasat 600.000 koruunit ukiumut aningaasaliissutigineqartarput, pisariaqartitsinerli annertugaangat tamatigut qaavatigut 200.000 koruuninik aamma aningaasaleeqqittoqarsinnaasartoq, Makka Fencker oqarpoq.

Ilulissani ukiuni kingullerni 2003-miit 2005 ilanngullugu Ilulissat kommunianneersut 215-it Qaqiffimmi katsorsartissimapput. Ukioq manna maajip tungaanut 45-nut katsorsaanissamut aningaasat piareersimasuutigineqarput. Katsorsartittussalli tamakkivinneqarnissaannut aningaasat aporfioqataasut Makka Fencker oqarpoq.

- Katsorsaanissamut aningaasat kommunip tunniuttagai soorunami killiliisarput aammalu kommunip nammineerluni aningaasaqassutsini aallaavigalugu immikkut tunniussaqaqqissinnaasarnera tassani aamma apeqqutaalluinnaqqissaartarpoq.