Qaqiffimmut utaqqisitsisarneq akisuneruvoq
Kommunini assigiinngitsuni aningaasanik immikkoortitsisoqarsimatillugu, Qaqiffinni imerajuttuunermi ikiaroorajuttuunermiluunniit katsorsartinnissami, utaqqisarneq sivisunerpaamik sapaatit akunnerini arfinilinni pisarpoq.
- Utaqqisarneq sivisuallaaraangat Qaqiffik tassani pisuuneq ajorpoq, kommunilli aningaasaaliisinnaassusaat pissutaasarpoq, Nunatsinni Qaqiffiit pisortaat Inge Holm taama oqarpoq.
Qasigiannguani inunnik isumaginninnermut ataatsimiisitaliami siulittaasoq Inge Marie Rosing, ippassaq radioavisimut oqarpoq, Qasigiannguani Qaqiffinniarlutik utaqqisartut ilaannikkut ukiuni pingasuni utaqqisariaqartartut.
- Katsorsartikkusulluni aalajangersimatiluni, ukiut pingasut utaqqinissaq sivisuallaarpoq. Komuunit oqalupput akissaaleqineq pissutaalluni taama sivisutigisumik ilaanni utaqqisoqarsinnaasartoq, isumaqarpungali utaqqisitsisarneq inuiaqatiginnut akisunerulersartoq. Qanormi akeqartarpa, meeqqat pinngitsaaliissummik angerlarsimaffianiit peersinneqaraangata? Inge Holm taama aperaaq.
