Qaqiffimmi katsorsartinniat utaqqisorpassuupput

Nunatsinni innuttaasut ilaat, imigassamik aanngajaarniutinillu ajornartorsiuteqartut, Qaqiffimmilu katsorsartinnissamut qinnuteqarsimasut, ingerlaannaq katsorsarneqarnissartik naatsorsuutigisinnaasanngilaat, kommuneqarfiit minnerusut kommuneqarfinnut annerusunut naleqqiullutik aningaasakinnerusut akissaqarniarnerat killeqartarmat.

Kommuneqarfiit ilaanni najugaqartut ukiut arlerlugit Qaqiffimmi katsorsartinnissamut utaqqisariaqartarput, kommunertik aningaasartuutissanik tulleriaasariaqartarmat.

Tulleriiaarineq pissutigalugu pilersuisut Qaqiffinnut salliutinniarneqartarput, pilersugaqanngitsullu utaqqisinneqartariaqartarlutik, kommunit ukiumut aningaasartuutissaminnik naammattusaarisariaqartarmata.

Sinerissami kommuneqarfiit tamarmik utaqqititsineq ajorput, katsorsaasunik tikisitsisoqartarmat.

Katsorsaavimmukarusullutik kommuneqarfimmi saaffiginnittut amerlagaangata, taakku ilaat ukioq sinnerlugu, imaluunniit ukiut arlerlugit, utaqqisariaqartarput, kommunip aningaasaatai killeqarmata.

Radioavisip misissuinermini paasivaa, kommuneqarfiit ilaanni Qaqiffimmi katsorsartinnissamut utaqqisut 20-70-llu akornanniittartut.

Qaqiffimmi katsorsartinneq imigassamik atornerluisumut ataatsimut 25.600 koruuneqarpoq, imigassamik ikiaroornartumillu atornerluisumut 38.400 koruuneqarluni, Qaqiffinni katsorsartitsinnermut aki kommuneqarfiit Namminersornerullutillu Oqartussat avillugu akilertarpaat.