Qaqiffik matulerpoq
Qaqiffik Ilulissani Nuummilu immikkoortortaqartoq ukiuni 16-ini atuutereersimalluni ukiup naanerani matusussanngorpoq. Namminersorlutik Oqartussat Frederiksberg Centerimut, tassa Qaqiffiup piginnittaanut, suleqatigiinnissamut isumaqatigiissutertik atorunnaarsimassuk:
- Imaanngilaq imigassamik ajornartorsiutilinnut Nunatsinni katsorsaasarneq unitsinniarlugu suleqatigiunnaarigut. Akerlianilli isumaqatigiissummik atorunnaarsitsinerput tunngaveqarpoq imerajuttunik katsorsaanermut isumaqatigiissutaasup nutarterneqarnissaa kissaatigineqarmat, Ann Birkekjær Kjeldsen, Peqqissutsimut Naalakkersuisoqarfimmi pisortaq oqarpoq.
Taassuma ilanngullugu oqaatigaa Namminersorlutik Oqartussat Frederiksberg Centerimik suleqateqarunnaarnerat suleqatigiinnerup naammaginartumik ingerlasimannginneranik patsiseqanngitsoq. Isumaqatigiissummilli atorunnaarsitsinerup tunngavigigaa katsorsaariaatsinut allanut kissaateqartoqarnera:
- Kissaateqartoqarami – aamma kommuuniniit – katsorsaariaatsimi suleriutsinik allanik ilanngussisoqarnissaanut allannguisoqarnissaanullu. Tamannalu tunngavigalugu suleqatigiinnissamut isumaqatigiissut atorunnaarsipparput, Ann Birkekjær Kjeldsen oqarpoq.
Frederiksberg Centerimi pisortaq, Gizur I. Helgason Radioaviisimut ilisimatitsivoq Qaqiffik katsorsagassanik novembarip qiteqqunnerani tigusisinnaajunnaassasoq, katsorsarneqartut ukiup naanerani piareerlugit naammassitinniarneqarmata.
Suliariumannittarsiuussisoqalerpammi neqerooruteqassanerpat?
- Soorunami apeqqutaavoq katsorsaariaatsitsinnut naleqquttumik Namminersorlutik Oqartussat ujartuinersut, Gizur I. Helgason oqarpoq.
Qaqiffiup immikkoortortaqarfiini marlunni katsorsaasutut sulisut arfinillit ukiup naanerani suliunnaarnissaannik sapaatip akunnera kingulleq nalunaarfigineqarput.
