QAPP: Sisimiunut tulaasseqqusineq akuersaarneqarsinaanngilaq
Ilulissani qalerallerivik annertusineqarpoq raajaleriffimmik annikillissaanikkut, tamannalu Qeqertarsuup Tunuani raajarniat aqqaneq marluk Ilulissanut tulaassisartut ilaasa sisamat Sisimiunut Paamiunulluunniit massakkumiit raajartaminnik tulaassiartortalernissaannik kinguneqarpoq. Sisimiunut tunisiartortariaqalersunut ilaapput Qasigiannguani raajarniutit marluk Avataq aamma Lars Karl 2. Qeqertarsuup Tunuani raajartanik Sisimiunukaassisarnissartik aalisartunut aammali ilaqutaannut amerlasuunut annertuumik eqquissasoq Qasigiannguani aalisartut piniartullu peqatigiiffianni siulitaasoq Jens Sandgreen, raajarniutillu Avatap piginnittua oqarpoq.
-Toqqaannartumik ilisimatinneqanngilagut, taamaallaat tusagassiutitigut tusarparput, pitinnaguli ilisimavarput aalisartut tusarniarneqassasut, kisianni ulloq manna tikillugu tusarniaasoqanngilaq.
Qasigiannguani raajarniat allamut tulaassisalernissaat tusarluarnanngeqisoq Jens Sandgreen oqarpoq.
-Royal Greenlandip naleqqussaanerminut atatillugu Aasiaat raajaleriffiat matuaa, raajarniutit pisaat Ilulissani raajaleriffimmi tamakkerlugit suliarineqarsinnaanerat tunngaviliullugu. Kisianni uagut ilisimareerparput taamaattoqarsinnaanngitsoq, eqquuttorlugu massakkut takusinnaalerparput.
Qeqertarsuup Tunuaniit Sisimiunut tulaassiartortarnissaq akisussaqisoq oqarpoq.
-Soorunami Sisimiunut Paamiunulluunniit tunisiartussagaanni takorloorneqarsinnaavoq solari qanoq atsigisoq atorneqassasoq, tunisiniarnermilu ullualunnguit atugassaapput – sila nalaarnerliussagaanni kipusoorujussuarnermik kinguneqarsinnaavoq, pingaartumik ukiariartulernerani.
Jens Sandgreen erseqqissaavoq raajanut akit allanngortinnagit atorneqartillugit Qeqertarsuup Tunuaniit Sisimiunut tulaassiartortarnissaq imminut akilersinnaanavianngitsoq.
- Qulaaninngaanniit naqisimanninnerujussuartut nalilerpara. Tamanna ernumassutigisariaqarpoq, tassami Naalakkersuisut kattussuutsitsinermut atatillugu, raajarniutaatillit piumaffiginikuuaat imminut akilersinnaasumik ingerlatsissasut, kisianni taamatut killilersuiffigineqartilluta imaluunniit nuutsitaasartilluta piumasarineqartoq naammassisinnaanngilarput.
Qasigiannguani raajarniutit marluusut aappaat Avataq ilaqutariinnit arfinilinnit piginneqatigiilluni ingerlanneqarpoq.
Ilulissani raajaleriffimmi taarseraattut ataasiinnanngortinneqarpata Qeqertarsuup tunuani raajarniat aqqaneq marluusut ilaat sisamat kujammut Sisimiunut tuniartortalernissaat Royal Greenlandip
maajip 23-nni ilisimatitsissutigaa.
Qeqertarsuullu tunuani raajarniat ilaat sisamat Sisimiunut tunisiartortarnissaat pillugu Qeqertarsuup tunuani raajarniat ilisimatinneqareersimasut, Ilulissani Royal Greenlandip aalisakkeriviani pisortaq Allan Jensen oqarpoq.
-Raajarniat Ilulissanut tulaassisartut junip 13-nni ataatsimeeqatigaavut, ataatsimiinnermilu aalisartut isumaqatigiissinnaanngimmata, angallatit sorliit sisamat Sisimiunut maannamiit tulaassiartortarnissaat Royal Greenlandip nammineerluni aalajangertariaqarsimavaa Allan Jensen oqarpoq.
Raajarniat aaqqiissut naammaginngikkunikku aaqqiissutissamik allamik namminneerlutik siunnersuuteqarsinnaasut Allan Jensen erseqqissaavoq.
