Qanoruumi aaqqissuisoq nutaaq
- Walter-ip suleqatigilernissaa nuannaarutigaarput. Taanna TV-lerinermik sungiussilluarsimasuuvoq, suliaminullu pikkorilluartuulluni. Taamaammat Qanoruup inerisarneqaqqinnissaanut peqataalluarnissaa qularinngilarput, KNR-imi nutaarsiassaqartitsinermut pisortaq Mikkel Bjarnø Lund oqarpoq.
Walter Turnowsky Qanoruumi sulileruni aaqqissuisooreersut Arnaq Nielsen aamma Bikki P. Kleist suleqatigilissavai.
- Isumarput malillugu Walter-ip pikkoriffigisai uagut Qanoruumi pikkoriffigeriikkatsinnut tapertaalluassapput. Tassa Qanoruup ullumikkornit pitsaanerulernissaanut tutsuiginarnerulernissaanullu peqataalluarnissaa naatsorsuutigaarput, tamatuma isiginnaartartutsinnut Nunatsinnullu iluaqutaanissaa ilimagilluinnarparput, suleqatigilernissaalu qilanaaralutigu, Mikkel Bjarnø Lund oqarpoq.
Atorfinittussanngortorlumi aamma qilanaaqaaq:
- Qanoruumi aaqqissuisunut ilanngunneqartussanngornera nuannaarutigeqaara. 24Sjællandske-mimi sulininni oqaluttuariaatsip pitsaasup, isiginnaartartunillu toqqaannarnerusumik attaveqarnermik aallussaqarnerma saniatigut TV-qarfiup inerisarneqarnera tamaat akuuffigisimavara. Taamaammat ilikkarsimasakka nassataralugit Kalaallit Nunaannukarnissara qilanaareqaara, Walter Turnowsky unnersiorpoq.
Walter Turnowsky-p siornatigut Nordjyske Medier, TvDanmark, Radio ANR suliffigisareerpai. TV-milu tusagassiortutut Fortbildunganstalt der Wirtschaft Dresden-imi Tysklandimiittumi ilinniarsimasuulluni.
Walter Turnowsky Østrigimiuusoq marsip aallaqqaataani Qanoruumi sulilissaaq.