Nutarterpoq 18.10.10 nalunaaqutaq 14:45
Ullumikkuminngaanniit Qanorooq ataasinngornikkut, pingasunngornikkut tallimanngornikkullu taamaallaat aallakaatinneqartalissaaq.
Piffissami sivitsortumi aaqqissuisup saniatigut tusagassiortoq ataaseq, aalajangersimasumik atorfeqanngikkaluarluni tusagassiinermik suliaqartartoq ataaseq nutaarsiassallu qulequtaannik atuaasartoq ataaseq Qanorooq imassaqartinniarlugu sulisimapput.
- Taamaattumik KNR-imi pisortat aalajangiuppaat tusagassiortut -nutserisullu- naammattumik amerlassuseqaqqilernissaasa tungaanut Qanorooq sapaatip akunneranut pingasoriaannarluni aallakaatinneqartassasoq, Frederik Lund, KNR-ip aallakaatitassiorfiani pisortaq, oqarpoq.
Taamannak aalajangerneq Qanoruumut isiginnaartartunut illersorneqarsinnaanersoq Frederik Lund-imut apeqqutigaarput:
- Soorunami taannartaa apeqquserneqarsinnaavoq. Kisianni aamma pissusiviusut aallaavigalugit aaqqissuuttariaqaratsigu. Inuit sulisuusut taama ikitsigitillugit illersorneqarsinnaasumik sulisinneqarnissaat aamma isumagisariaqarparput, Frederik Lund oqarpoq.
Qanoruumi tusagassiortutut atorfiit pingasut ullumikkut inuttaqartinneqanngillat. Tusagassiortussaaleqinerlu pissutigalugu Qanoruup aallakaatinneqartarnerata akuttunerulissaaq:
- Qanoruumi sulisut arpasukaartorujussuullutik sulipput, namminneq suliartik allaat naammaginartutut isigisinnaasarnagu. Qanoruup suliffissatut orniginarnerusinnaanerigaluanut aamma taanna aporfiliisuuvoq, Frederik Lund oqarpoq.
Namminersorlutik Oqartussani - taakkulu suliffeqarfiutaanni - juunimi atorfinitsitseqqusiunnaarneq atuutilermalli, KNR-i sulilersunut nutaanut suliffimminnut atatillugu inissarsinissaasa tungaanut inissiigallarnissaminut periarfissaarunnikuuvoq.
- Sulisunik soraartoqarsimappat, sulisunik nutaanik atorfinitsitsinissamut periarfissaqanngilaq, Frederik Lund oqarpoq.
KNR-i atorfiit inuttaqanngitsut inuttassarsiornissaanut immikkut akuerineqarnissamut qinnuteqarnikuuvoq.
Qanoruumi tusagassiortunik amigaateqarnerup saniatigut Qanoruumi nutserisut pingasut amigaataapput.