Qanorooq nutsertoqarnera pissutigalugu sivikinnerussaaq
KNR-ip nutaarsiassaqartitsivia ulluni makkunani nutserneqaleruttorpoq. Immikkoortortaqarfik tamaat Nuummi illumut allamut sapaatit-akunnerata naanerani nuunneqarpoq. Tamannalu pissutigalugu Qanorooq ullumi ataasinngornermi aqagulu marlunngornermi pisarnermit sivikinnerulaassaaq.
- Nutsernitta isiginnaartartutsinnut sapinngisamik akornutaannginnissaa sulissutigaarput, aaqqissuisoq Walter Turnowsky oqarpoq.
- Atortorissaarutilli ilaat misilittaqqaarneqartussaapput, ledningit kingulliit ikkussorneqarlutik suleriaatsillu nutaat atorneqalertussaassallutik. Taamaammat sivikinnerulaartumik aallakaatitsiniarluta aalajangerpugut.
KNR-ip illutoqaata oqoqarpallaalersimanera pissutigalugu nutsertoqartariaqalersimavoq.