Qanorooq Inatsisartut ataatsimititaliaanni oqaluuserineqassaaq

Qanoruup sapaatit akunneranut pingasoriaannarluni aallakaatitsisalernissaa, partiini naalakkersuisuutitaqartuni illuatungiliuttunilu tupaallaatigineqarpoq.
Allattoq Jens Thorin
oktobarip 18-at 2010 16:03

Sulisunik atorfimmut atatillugu ineqartinneqartussanik atorfinitsitsisinnaajunaarallarnerup kingunerisaanik, Qanoruup sapaatit akunneranut pingasoriaannarluni aallakaatitsisalernissaa, partiini naalakkersuisuutitaqartuni illuatungiliuttunilu tupaallaatigineqarpoq.

- Qanoruup sapaatit akunneranut pingasoriaannarluni aallakaatinneqartalernissaa Siumumit tupaallaatigivarput. Aamma kalaallisut aallakaatitassiat taama ikereertigisut Qanoroorlu taama naareertigisoq annikillisaaqqinnissaq akuersaaruminaatsorujussuuvoq, Siumup tusagassiutit pillugit oqaaseqartartua, Doris Jakobsen, oqarpoq.

Taamaammallu:

- Taamaammat una pisoq ataatsimiittaliamut ingerlateqqissuarput. Doris Jakobsen oqarpoq.

Demokraatit tusagassiutit pillugit oqaaseqartartuata, Andreas Uldumip, Qanoruup aalakaatitaasa ikililerneri ajuusaarutigaa:

- Ajuusaarnartorujuuvoq, inuiaqatigiit nutaarsiassanik sapaatit akunneranut pingasoriaannarlutik takutsitsivigineqartalernissaat. Pingaarnersiuineq KNR-p pisortaanut suliassani pingaarnerpaassaaq.

Taassuma aamma suliassaq Inatsisartut Kultureqarneq, Ilinniartitaaq, Ilisimatusarneq aamms ilageeqarneq pillugit atastsimiititaliaanut suliassanngortinniarlugu oqatigaa.

- Neriorsuutigisinnaavara, ataatsimiititaliamut qaqissallugu, Andreas Uldum oqarpoq.

KNR utaqqiisaasumik ineqartussanik atorfinitsitsinissamut Namminersorlutik Oqartussanit immikkut akuerineqartoq ullumi tusarparput.

- KNR atorfinnik inuttasarsiuisinnaavoq, taamaaliussagunilu Namminersorlutik Oqartussaniit pillarneqaatigisinnaajunnaarpaa, KNR-ip aallakaatitassiorfiani pisortaq, Frederik Lund, oqarpoq.

Kisianni aamma nangippoq:

- KNR-ip atorfeqartitsinissamut atatillugu ineqartitsinissani nammineq aningaasartuutigissavaa. Tassalu immikkut aningaasartortariaqassaaq.

Kisianni Qanoruup sapaatit akunneranut pingasoriaannarluni aallakaatitsisarnissaa suli allanngunngilaq.

- Qanorluunnit massakkut taamatut immikkut akuersissummik tunineqaraluarutta, massakkorpiaq sulisut ikippallaarput. Taamaammat ullumikkut aalajangerneq atuukkallassaaq, sulisut naammalernissaasa tungaanut, Frederik Lund oqarpoq.