Qanorisiorluta utoqqartavut ataqqinassusilimmik sullissinnaavagut?

Namminersorlutik Oqartussat Katuami isumasioqatigiissitsisuupput, Naalakkersuisullu utoqqaat pillugit periusissiaata isumasioqatigiinnermi saqqummiunneqarnissaa isumasioqatigiinnermut tunuliaqutaavoq.

Utoqqaat atugaasa pitsanngorsaavigineqarnissaannut alloriarnerit siulliit Naalakkersuisut Utoqqaat pillugit periusissiaanni taakkartorneqartut, Ilaqutariinnermut Naalakkersuisoqarfiup ataani inissisimasumi Meeqqanut atugarissaarnermullu immikkoortortaqarfimmi pisortap Kirsten Olesenip oqaatigaa.

Ilinniartitaanerup ataatsimut isigalugu qaffassaavigineqarnissaani utoqqarnik sullissisut aamma ilaatinneqartut, taassuma oqaatigaa.

- Utoqqarnik sullissisut amerlasuut ilinniarsimanngitsuupput, taamaammat piginnaanngorsaqqiinissaq matumani pingaaruteqarpoq, Kirsten Olesen, Meeqqanut atugarissaarnermullu immikkoortortaqarfimmi pisortaq, oqarpoq.

Utoqqarnik sullissisut sumiginnagaasimasutut ilaatigut oqaatigineqartartut, taassuma oqaatigaa, utoqqaalli siornatigut amerlavallaarsimannginnerat ilaatigut aamma pissutaasoq oqaatigalugu.

Utoqqaallu sullinneqarneranni suut ullutsinni pisariaqartinneqarnersut isumasioqatigiissitsinikkut paasiniarneqarpoq.

- Utoqqaat sapinngisamik angerlarsimaffimminiiginnarnissaat, eqeersimaartuunissaallu, Naalakkersuisut utoqqaat pillugit periusissiaanni qitiulluinnarpoq, Kirten Olesen oqarpoq.

Utoqqarnik sullissisut isumasioqatigiinnermi saqqummiussaat, Meeqqanut atugarissaarnermullu immikkoortortaqarfimmut uteruni atorluarsinnaassagini, Kirsten Olesenip oqaatigaa.

- Utoqqaat sunik pisariaqartitsinersut immikkut ilisimasalittut eqqoriartuaannarsinnaavarput, sullissisulli utoqqarnik ulluinnarni sullissisartut aamma tusaaniarneqartariaqarput, Kirsten Olesen oqarpoq.

Qeqertarsuarmiu David Brandt, Qaasuitsup Kommuniani utoqqarnik sullissisoq, miljømedarbejderilu, isumaqatigiissitsinermi peqataavoq. Taanna utoqqarnik sullissisut isumasioqatigiissinneqarneranni pisssarsilluarnerarpoq.

- Ingerlariaqqiffissanik nassaartorneq ingerlavoq. Taakkuninnga pissarsiaqarnaqaaq. Utoqqaallu ilaatigut maannakkut inuusunnerusunut attaveqarsinnaanerat qanoq aqqutissiuunneqarsinnaanersoq pillugu aamma pissarsivugut. Isumasioqatigiinneq pingaarutilerujussuartut ingerlasoq paasinarpoq, Qaasuitsup Kommuniani utoqqarnik sullissisoq David Brandt oqarpoq.