Blok 5-imi toqutsineq: Qanoq qaqugukkullu pisoqarsimanera suli erseqqinngitsoq

Blok 5-imi toqutsisoqarnera pillugu eqqartuussinerup ulluata aappaa ullaaq manna nalunaaqutaq qulingiluanut aallartippoq, tassani toqutaasoq inissiap quiani nassaarineqarpoq.

Ilisimannittut ullumikkut eqqartuussinermi nassuiaateqassapput. Tassani ilisimannittut pingasut nassuiaateqassallutik, unnerluussisussaatitaasulli DNA-mik misissuinerit nalunaarutigeqqarpai.

Ilisimannittoq ullormi nassuiaateqartussaq siulleq qulinut qiteqquttoq nassuiaateqarpoq. Ilisimannittoq angutaavoq utoqqaliarsaartoq, taanna blok 4-mi 5-imilu 2024-mi oktobarimi inissiami ikiortitut sulivoq.

Ilisimannittoq quimut oktobarip aallartilaarnerani saliiartortinneqarsimalluni oqaluttuaraa. Taassumali qaqugukkut suliarisimanerlugu eqqaamasinnaajunnaareersimavaa.

Kisianni ullormi unnerluussisussaatitaasut unnerluutigisap toqutsinerarfiani marlunngornermi suliakkiut suliarisimallugu, politiinit apersorneqartillugu nassuiaasimavoq.

Unnerluussut naapertorlugu 20-nik ukiulik oktoberip aappaata sisamaatalu akornanni toqutaasimasoq allaqqavoq. Inissiami ikiorti ulloq sioqqullugu sumiiffimmiissimavoq.

- Pasinartumik takusaqanngilanga, quimut matu ammanngilara silataani saliivunga, angut utoqqaliarsaartoq eqqartuussivimmi nassuiaateqarpoq.

Tamakkua tamarmik qanoq imminnut attuumassuteqarnersut suli erseqqissinngilaq. 42-nillu ukiulik suli oqaaseqarumanngilaq. Eqqartuussinermi ullormi siullermi aamma oqaaseqanngilaq.

Blok 6-imi najugallit nassuiaapput

Ilisimannittut ullumikkut nassuiaasussat aappaat arnaavoq blok 6-imi najugalik. Taassuma inigisaanit blok 5 takuneqarsinnaavoq eqqartuussivimi oqaluttuarpoq

Arnap madrassi eqqaavimmut pingasunngornermi oktobarip ulluisa aappaanni igippaa.

- Madrassi eqqaavimmut igereerlugu maluginialerpara illikartinneqarsimasoq. Ullullu marluk qaangiuttut suliffinniit angerlarninni maluginialerpara madrassimut igitannut allat marluk qaavanut ilineqarsimasut, taanna eqqartuussivimmi oqaluttuarpoq.

- Eqqarsarpunga madrassip aappaanut arlaata viinni kuisoorsimagaa imaluunniit titartaasoqarsimasoq. Immaqaluunniit arnaq madrassimi ernisimasoq.

Madrassini marluusuni ataaseq aappaluttumik qalipaatilimmik simerneqalersimasoq, arnaq oqaluttuarpoq.

Ilisimannittoq alla aamma blok 6-imi najugalik assinganik oqaluttuarpoq.

- Madrassi blok 5-ip eqqaani eqqaaverujussuarmiittoq aattaqartoq takuara.

Qanoq ilillutit nalunngiliuk aajusoq, unnerluussisussaatitaasoq aperivoq.

- Aammut assinguvoq, ullumikkut ilisimannittup arnap aappaa akivoq.

Madrassit containerip eqqaani politiinit assilineqarnikut unnerluussisussaatitaasumit eqqartuussivimmi takutinneqarmata, ilumut madrassi taama inissisimanersut arnap nalornisigileraluarpaa. Kisianni assinit aattaqartut takugamigit takusani aajusoq uppernarsarpaa.

Ilisimannittup madrassit ulloq suna takusimanerlugit eqqaamanngilaat kisianni politiinut nassuiaanermini oktobarip aappaata sisamaatalu akornanni takusimallugit nassuiaatigaa.

Arnap pinerluttoq ilisarisimaneraa aperineqarpoq – taassumali ilisimanagu takunikuunagulu oqaatigaa.

Angut takusimallugu madrassillu aamma ullaaq taanna takusimallugit arnaq oqaluttuarpoq. Pinerlisuunersoq imaluunniit angut alla takusimanerlugu arnap nassuiaateqarnera malillugu erseqqinngilaq.

Nakuusersimasutut unnerluunneqarsimasoq

Unnerluunneqartoq nakuusersimasutut marlunnik immikkoortortalimmut aamma eqqartuunneqartussaavoq tassungalu atatillugu ilisimannittoq alla ullumi eqqartuussinermi nassuiaateqassaaq. Taanna Københavnip Byretianit videokkut peqataatinneqarpoq.

Kisianni ilisimannittut paasisimanngilaa sooq aggersarneqarsimanerluni, taassuma arnap juulimi 2024-mi nakuusersimasutut unnerluussimagaa, unnerluussisussaatitaasup oqaluttuuppaa, taassumali eqqaamanngivillugu oqaatigaa. Arnap tamanna paatsiveerussutigimmagu unnerluussisussaatitaasup Aprilia Jespersenip ilisimannittutut nassuiaateqartussatut taamaatiinnarpaa.

- Isumaqarpunga ilisimannittup nassuiaataanik tusarnaarnissaq iluaqutaanavianngitsoq, taanna eqqartuussivimmi oqarpoq.

DNA atisani nassaarineqartoq

Toqutsisoqarsimaneranut suliaq unnerluussisussaatitaasup misissoqqissaaramiuk uppernarsaatit arlallit saqqummiuppai. Pinerlisup atisaani toqutaasup DNA-va oktobarip aqqaneq aappaanni tigusarineqarnerani nassaarineqarsimasoq saqqummiussinermi oqaatigineqarpoq. Paasissutissalli taakkua qanoq pingaaruteqartiginersut aqagu eqqartuussisoqaqqilerpat paasinarsissaaq. Tassani toqusup timaanik misissuisartoq ilisimannittutut nassuiaateqassaaq.

Ilisimannittoq siulleq ulloqeqqanut unillatsiareernermi nassuiaateqartussaq toqutaasup marluliaraa.

- Marluliama toqoreernerata kingorna aliasorujussuarnikuuvunga, meeraalluta atasorujussuuvugut taanna oqaluttuarpoq.

Marluliaqatini qanga kingullermik takusimanerlugu eqqaamasinnaanagu, ilaquttamili angerlarsimaffiata arlaanni kingullermik takullugu, taanna oqaluttuarpoq.

Toqutaasoq blok T-miinngikkaangami allamiittartoq, kisianni blok 5-imik eqqaasaqarnera tusarsimanngisaannarlugu marluliaqataa oqaluttuarpoq.

- Blok 5 pillugu ilisimaqanngilanga, marluliara tassani unnuisimasoq tusarsimanngisaannarpara uangalu aamma immaqa ataasiaannarlunga tassaniinnikuullunga, marluliaq oqarpoq.

Unnerluutigineqartup kinaanera nalullugu, toqusimasullu arlaannik aaqqiagiinngissuteqarsimaneranik nammineq ilisimasaqarani qatanngutaasoq oqaluttuarpoq.

Kisianni taanna (ajortumeerneqartoq aaqq.) arlaleriarluni pissutissaqanngitsumik ajortumeerniarneqartareersoq, illoqarfiullu akunnittarfinut arlaleriarluni qimaasarsimasoq taassuma (marluliaqataata aaqq.) oqaluttuaraa.

lisimannittup nassuiaanera akunnermi ataatsimik sivisussuseqarpoq, eqqartuussisumit, eqqartuussisooqataasumit, illersuisumit unnerluussisussaatitaasumillu arlaleriarluni unitsinneqarpoq nassuiaanerani unnerluussisussaatitaasoq malinnaasinnaajunnaartarmat.

Suliap suliarineqarnerani ilisimannittut ullumikkut nassuiaateqaraluartut 2024-mi oktobarip aallartilaarnerani qanoq pisoqarsimanera suli erseqqissinngilaq. Suliap eqqartuussivimmi suliarineqarnera aqagu nanginneqassaaq.