Qanoq isummertarneq sammineqassaaq
Inaarluutilinnik sapaatip-akunneqartitsisarneq ukiuni kingullerni ukiut tamaasa pisalerpoq, ukiormannalu Nunami namminermi naalakkersuisoqarfiup suliniutinut Nunarput tamakkerlugu ingerlanneqartussanut 68.000 koruunit agguaassimavai.
Innarluutilinnut immikkoortortami pisortap Naja Rosing Fleischerip illoqarfiit tamakkingajallugit tapiisoqarsimasoq oqaatigaa. Meeqqat immikkut sammineqartussaammata, sinerissami aaqqissuussinerni meeqqat akuutinneqarput.
- Qanoq isummertarnerup allanngortinnissaa pineqarpoq. Inuit assigiinngitsuunerisa akuerinissaat meeqqat ilinniartariaqarpaat, Naja Rosing Fleischer oqarpoq.
Assersuutigalugu Qaanaami akullerni atuartut sapaatip akunnerani immikkut sammissavaat "allanit allaaneruneq", Qaqortumilu meeqqerivimmiut innarluutillit angerlarsimaffiannut pulaartinneqassallutik.
Sapaatip akunnerani sammineqartussat illoqarfinni kommunimit akuliuffigineqaratik nammineerluni suliniuteqarnikkut pissapput. Taamallilluni taamaallaat Qeqqata Kommuniani sapaatip akunnerani pisussat innuttaasunut ilisimatitsissutigineqarput.
Aaqqissuussinerit tamakkerlugit Isumaginninnermut Naalakkersuisoqarfimmit allattugaatigineqanngillat, soqutiginnittulli illoqarfimminni nivinngaaviit alaatsinaaqqullugit innaarluutilinnullu peqatigiiffiit attaveqarfigeqqullugit kajumissaarneqarput.
