Qanngullarmat qaartoortoqarsorigaluarpaat
Qeqertarsuarmi nuna, ricterip uuttuutaa naapertorlugu 4,5-mik sakkortussusilimmik ippassaq ualikkut marlunngulernerani sajuppoq. Qeqertarsuarmi politeeqarfiup pisortaa Jens Mølgård oqarpoq siullermik eqqarsarsimagaluarluitik qaartoortoqarsimasoq.
-Siullermik isumaqaraluarpugut nivattaassuarmik saneqquttoqartoq, taamaattoqanngimmalli illoqarfimmi qaartoortoqarsorileraluarparput. Kinguninngualu politeeqarfimmi qilaami qulliit sajulerput, issiavippullu sajulerluni. Taamaalilluni paasivarput nuna sajuttoq, Jens Mølgård oqarpoq.
-Tamatuma kingorna siarnertoqarpoq, soorlu Royal Greenland-imi qarasaasiat sajussimapput, politeeqarfiup pisortaa oqarpoq.
Ilanngullugu oqaatigaa saaffiginittut ingasassimanngitsut, inuillu arfineq marluk missaat saaffiginnissimasut nunap sajunneranik nassuiaaneqartarsimallutik.
Danmarkimi nunatsinnilu ujarassiuutut misissuisarfimmiit Tine Larsen oqarpoq, nunarput sajukkajuttuungimmat sajunnerup 4,5-mik sakkortussuseqarnera sakkortuutut taaneqarsinnaasoq, sajukkajuffiusumiisimagaluarpallu soorlu Californiemi imatorsuaq malugineqarsimassanngikkaluartoq. Sajunneq Kangerlussuarmi 4,5-mik sakkortussuseqartutut uuttorneqarpoq, Kangerlussuarlu Qeqertarsuarmiit 267 kilometerinik ungasissusilimmiimmat, sajuffiup qiterisaa qanoq sakkortutiginersoq paasiniarneqaqqaasasoq oqaatigineqarpoq. Nunattalu sajukkajuttuunginnera pissutigalugu sajunnermik misigisimasut paasissutissanik qarasaasiaq atorlugu nassiussisinnaaput uunga: geus@geus.dk
Ukiuni kingulliunerusuni nunatsinni nuna sakkortunerpaamik Maniitsumi januaarip 22-iani 2001-mi sajuppoq. Taamanikkut sajunneq richterip uuttuutaa naapertorlugu 4,9-mik sakkortussuseqarpoq.
