Qanittukkut aaqqiissuteqartoqassaaq
Palasip atorfinitsinneqartup ilaqutaqqamini pisut peqqutigalugit atorfininniarunnaarnerata kingorna ilagiit kalaallit Danmarkimi najugaqartut erloqissutaasa qanittukkut aaqqiissuteqarfigineqarnissaa Doris Jakobsen, Siumut sinnerlugu Folketingimut ilaasortaasup oqaatigaa.
Allattoq Peter Troelsen, Simon Uldum
Danskit ilageeqarnermut ministeriata Manu Sareenip (RV) qanittukkut aaqqiissutissamik nassaarniaqataanissaa Doris Jakobsenip naatsorsuutigilluinnarpaa. Ilaatigut pigisanik Danmarkimut assartuinissamik ajornartorsiuteqarnerup aaqqiissuteqarfigineqarneratigut tamanna pissaaq.
-Manu Sareenip sapaatit akunnerata tulliani ataatsimeeqatigisinnaanissaa naatsorsuutigaara, tassanilu ajornartorsiummut pilersumut aaqqiissutissamik nassaarniassalluta. Ministerip aaqqiissutissamik tamat inooqataaffigisinnaasaannik nassaarniarnissaminut ammanissaa ilimanarpoq, Doris Jakobsen nassuiaavoq.