Qanimut suleqatiminnut misiginneqatiginnissummik allagaqarput
Norgemi qeqertami Utøya-mi inuusuttut Arbejderpartimut ilaasortat 86-it toqutaareernerisa kingorna Siumup siulittaasua Aleqa Hammond misiginneqatiginnissummik allagaqarpoq.
Allattoq Apollo Jeremiassen
juulip 25-at 2011 09:06
Allakkami ilaatigut ima allappoq:
- Nunani avannarlerni suliniarnitsinni Siumumit qanimut suleqativut Arbejderpartiet ajortumeerniarfigineqarnerup kingorna annertuumik tupannartumik atugaqarneranni misiginneqataangaarpugut. Aleqa Hammond allappoq, nangillunilu:
- Sulissuugut siunnerfik ataaseq angutserlugu, tassalu kiffaanngissuseq aammalu tamat oqartussaaqataanerat ataqqillugu mianeralugulu, ataatsimoorluta pinerliiniarneq ajugaatinngisaannarlugu akuersaanngisaannarlugulu. Aleqa Hammond misiginneqatiginnissumini ilaatigut taama allappoq.
Naalakkersuisut siulittaasuat, Kuupik Kleist Kalaallit sinnerlugit misiginneqatigissummik Norgemiunut nassiussereerpoq.