PANAM2018 Qanilliartortoq suli suliassaqaaluppoq
Suliniummi aqutsisunngorlaaq, Poul Petersen piffissami aggersumi ataatsimiittaqattaarlunilu isumaqatigiinninniaqattaassaaq. Suliulli suli qulakkiivinneqanngikkaluartoq suliniummi aqutsisup suliap inissivinnissaa neriuuteqarfigilluarpaa.
Amerikap nunavittaata kujaatanit, qeqqanit avannaaneersullu unammisartut 250-iusut Amerikap nunavittaasa assammik arsaannissaannut peqataajartorlutik juunip 15-ianit 25-anut Nuummiissapput, aaqqissuussamilu nunatsinni assammik arsartartut kattuffiat aaqqissuisuuvoq.
Aaqqissuussaq taanna assammik arsartartut kattuffiannut immikkut ittumik akisuvoq, tassa GHF-ip aaqqissuussineranut unammeqataasussat tikinnissaannut timmisartunik attartornissamut aningaasarpassuarnik nassaarnissamik GHF pisussaaffeqarpoq.
PANAM2018 17 millionit koruuninik akeqassasoq siusinnerusukkut eqqaaneqarpoq, naallu Namminersorlutik Oqartussat, Kommuneqarfik Sermersooq suliffeqarfiillu namminersortut arlaqartut aningaasatigut tapersiigaluartut aningaasarpassuit suli amigaataapput. Taakkuli qassiuneri Poul Petersenip oqaatigisinnaanngikkallarpaa, tamatumanilu nunatsinniit nunanilu allaneersut tapiissuteqarsinnaasut "isumaqatigiinniarfigineqarnerat oqaloqatgiinnerilu" tunngavilersuutigaa.
Unammiartortussat tikisinniarnissaannut periarfissat qaammatit arlaqaaluttut matuma siorna ilungersunarsimapput, unammillernartorli taanna inissikkiartulersoq, PANAM2018-imi aqutsisoq, Poul Petersen oqarpoq.
- Kangerlussuarmut timmisartuunneqarnissaannut attartorpugut attartortussaassallutalu. Massakkut aallaavittut Mexico City-minngaanniit qularnanngitsumik Canada aqqusaariarlugu Kangerlussuarmut tikinniartussaassapput. Ullussai isumaqatigiissutillu ingerlaarput, Poul Petersen oqarpoq, oqaatigalugulu Air Greenlandip Nuummut Kangerlussuarmullu timmisartuussinissaa pillugu oqaloqatigiinneq naammassipajaareersoq.
Unammisartut atisaajartarfissaat ataatsimiittarfissaallu eqqarsaatigalugit oqaatigineqarnikuuvoq sanaartortoqartariaqarsinnaasoq, taamaattoqassanngitsorli Petersen oqarpoq.
- Inussivimmi Nuullu haaliani pioreersut atorneqassapput. Taakku aporfiit annikittunnguugaluit misissorusaarpagut aaqqissorusaarlugillu, Poul Petersen oqarpoq.
PANAM2018 juunimi Nuummi pinissaa piviusunngussanersoq qularnaarlugu aqutsisup oqaatigisinnaanngikkaluarpaa, taamaattoq piviusunngornissaa neriuuteqarfigilluarpaa.
AAMMA ATUARUK Pan Am kan ende som en stor fiasko
AAMMA ATUARUK Pan Am-ertoqarnissaanut assartuinissat aningaasallu amigaataasut
AAMMA ATUARUK Naalakkersuisut Pan Am-ip nunatsinni aaqqissuunneqarnissaanut aningaasaliiniartut
AAMMA ATUARUK Sermersooq Pan Am 2018-imut amerlanerusunik aningaasaliisoq
