Qanga mileraataasarsimasut quarsaarnartut
Tassa nunat inoqqaavisa meerartaat kaallutik toqqusassiariinnarneqartarsimapput.
Atuarfinni angerlarsimaffiutigisuni, Inuit, indianerit métisillu meerartaasa atuarfigisaanni pisut alianaqisut allat maanna saqqummiunneqarput. Matumani 1940-kkunni pisimasut pineqarput.
Tassami paasinarsivoq, nerisat inuussutissartaqassusiannik immikkut ilisimasallit ilaat taamani isumaqarsimasut, atuartut nerisakilliornersut nerisakilliunnginnersulluunniit misissoraanni pitsaassaqisoq.
Uppernarsaatit maanna nassaarineqartut takutippaat, meeqqat arfinillit aqqaneq marlullu akornanni ukioqartut ILUMUT nerisakilliortut, misissuinnarnagillu nerisassaannik tunigaanni eqqornerussasoq, ilisimatuut takusinnaasimagaluaraat.
Inuilli indianerillu meerartaat misileraatigissallugit aalajangerput.
Affaat appelsinanik vitamininillu nerisineqarput, affaat allat nerisaqanngitsut, takuniaannarlugu suna pisaanerunersoq!
Taama misileraaneq Canadap naalakkersuisuinit aningaasanik taperserneqarpoq.
Meeqqat katillugit 1300-t ilisimatuussutsikkut 1942-miit 1952-imut misileraanermi ilaapput, meeqqallu ilaat misileraanermi perlerlutik toqusimassangatinneqarput.
Taama ilisimatusarneq ilisimatuup Ian Mosbyp allaaserisaani saqqummiuneqaqqammersumi qulaajarneqarpoq. Saqqummiussallu kanngunartuliatut Canadami isigineqarput.
Shawn Atleo, Canadami indianerit siuttuisa qullersaat, CTV Newsimut oqarpoq, taamaattoqarsimaneranik siusinerusukkut tusatsiartarsimalluni aammalu Tuberkulosertunik misileraasoqartarsimasoq.
- Ajornerpaavoq, Inuit, indianerit métissillu meerartaasa affaat ullumikkumut suli kaammata, tassalu naammattumik ullormut nerisaqarneq ajorput.
Indianerit siuttuata allap pisimasut inuiannik toqoraanertut taavai.
