Qamuteralannik sapiiserluni pinnguarnernik isiginnaagassiorniarput

Sisimiuni snescooterertartut snescooterinik tunngasunik isiginnaagassiornissaminnut pilersaarusiuleruttorput. Isiginnaagassiaq piviusunngorpat Sisimiut qaqqaani snescooterinik sapiillisaarlutik pinnguarnerit isiginnaarneqarsinnaapput.
Allattoq Dorthea Johansen
apriilip 16-at 2014 07:34

Qamuteralannik pinnguarluni qaqqakkut sivingasukkut ingerlaarnerit, tinngaallalluni qangatarujussuarnerit allarpassuillu Sisimiuni takussaapput. Sisimiuni qamuteralannik pinnguarnermut piginnaanillit isiginnaagassiorniarlutik pilersaarusiuleruttorput.  

- Tassa scooterfilmiliorniarpugut. Inuit arfineq-marluuvugut isiginnaagassiorniarlutik ilaasut. Taakkuulluta taanna ingerlateruusaassavarput. Sunngiffitsinni snescootererusaartilluta taanna suliarinerusarparput, Isiginnaagassiorniarluni pilersaarusioqataasut ilaat Krister Støvlbæk oqarpoq.

Taassuma aamma eqqaavaa qamuteralannik pinnguarluni sapiillisaarnermut isiginnaagassiap nunatsinni susoqartarnersoq oqaluttuarissagaa.

Ullutsinni nunarput nutaaliaasumik ingerlasoq takutikkusuppaat. Nunatsinnilu pinngortitami qimussinik kisimi ingerlasoqarneq ajortoq aamma takutikkusullugu.

Qamuteralannik sapiillisaarluni pinnguarnermut isiginnaagassiaq pisimasuinnik tunngaveqassaaq.

- Dokumentarimut qaningajassinnaavoq. Imatut filmiunngilaq, takussutissaqassaaq assigiinngitsunik. Ilai sapiisernerit imaluunniit qummut snescooterinik majuarnerit. Ilioriasaarnerit taakku takuteqattaassavagut. Dokumentaritut taaneqarsinnaavoq, Isiginnaagassiorluni pilersaarusioqataasut ilaat snescooterertartoq Maannguaq Philip Lauritzen taama oqarpoq.

Qamuteralannik sapiiserlutik pinnguartartartut isumaqarput nunarput nunanut allanut nittarsaanneqarnerusariaqartoq. Nunatsinnullu takornariat tikerartalernerunissaat anguniarlugu isiginnaagassiamik sananiarput.

- Isiginnaagassiornissaq pisariaqartissimavarput nunani allaninngaanniit tusartaratsigu "Kalaallit Nunaanni susoqarpa?". Amigaatigineqartarmi Kalaallit Nunaanni susoqartarnersoq paasissallugu. Taava arfineq-marluulluta aalajangiussimavarput isiginnaagassiamik sananiarluta. Kalaallit Nunaanni periarfissagut suunersut nunanut allanut takutikkusullugit. Taamaalilluta isumaqaratta takornariat maanngartissinnaassallugit soorlu maanga snescootereriarlutik, Maannguaq Philip Lauritzen oqarpoq.

Isiginnaagassiaq piviusunngussappat aningaasaliisussanik pisariaqartitsipput. Aningaasaliisussarsiornerlu oqitsuinnaasimanngilaq, itigartitaasarsimammata. Taamaakkaluartoq tapersersorneqarlutik aningaasaliiffigineqarsimapput. Sulilu aningaasaliisussanik pissarsiorlutik.

- Januarimi suliffeqarfinnut assigiinngitsunut qinnuteqaqattaarluta aallartippugut. Filmiliuutiunerusut qinnutigisarpagut. Taavalu filminik katiterisinnaasunik aningaasaliisinnaanersut apersortarlugit. Aningaasaliisoqarnikuuvoq filmiliuutiunerusunik, Maannguaq Philip Lauritzen  oqarpoq.

Qamuteralannik sapiiserluni pinnguarnermi isiginnaagassiornermi inuttaaqataasussaavoq Sisimiut avataatungaanit qoororsuakkut qamuteralannik nakkakattarsimasoq. Taannalu nakkakattarneq filmiliarineqarsimavoq. taannalu filmiliaq Youtubemi 400.000-it sinnerlugit takuneqarsimavoq.

Maannguaq Philip Lauritzenip Krister Støvlbækillu radioaviisimut ilanngullugu oqaatigaat aningaasaliisussanik suli pissarsiorlutik. Pilersaarutillu malillugit isiginnaagassiaq ukioq 2015 naatinnagu naammassineqassasoq.