Qamuteralannik GM-riartut
![](/sites/default/files/styles/image_934x467/public/article_images/snescooter_630_0.jpg?itok=CrHBjAID)
Arnat pissartanngorniunnerat Ilulissat timersortarfianni ullumi aallartissaaq. Peqataasussalli suli ilai apuutinngillat. Kugsak 45 Qasigiannguaniik aamma UB-83 Upernavimmiik ullumi aqagulu apuunnissaat naatsoruutigineqarpoq.
Arsaattartut arfineq marluk meeqqallu marluk Qasigiannguaniik Ilimanamut qamuteralannik kalitalinnik ippassaq ingerlaarput. Maannali pinngortitarsuup saammisaarsinnaanera kisimi apeqqutaaginnalerpoq Qasigiarmiut apuussinnaassanersut imaluunniit illoqarfigisaminnut utiinnartariaqassanersut. Pilersaarutaavoq angallammik Ilimanamiit Ilulissiarnissaq sikuli pissutigalugu tamatuma iluatsissinnaanera qularnartoqarpoq.
- Siulersuisut utaqqikatallugit arnat nammineq angalanissatsinnik aaqqissuussiniarsimavugut. Kisianni piffissaq kingullerpaaq atorlugu tamanna pimmat angalaniarneq ajornakusoortorujussuuvoq, Nukaaraq Lyberth Kugsak 45-meersoq KNR-mut taama oqarpoq.