Qamuteralannik akitsuusersueqqinniarneq akerlerineqartoq

Qamuteralaat ilumut akitsuusersoqqinneqassappat? Naalakkersuisut taamaaliulersaarput, Qeqqata Kommunianilu politikerit ilaasa tamanna akerleraat.
decembarip 16-at 2013 04:44

Naalakkersuisut akitsuutinik allannguiniarnerannik Qeqqata Kommuniani Demokraatit akerliusuupput. Akitsuuseeqqittoqarneratigummi qamuleralannik angalaneq akisunerulissaaq.

Nunatsinni ilungersunartumik inissisimanerput eqqarsaatigalugu, inuussutissarsiutinik ingerlaqartartut akitsuutinik qaffaanissaq pisariaqartinngilaat. Entreprenørimmi aningaasartuuteqarnerulernerat sipaarniarnermik kinguneqassaaq sulisitsisullu sulisuminnik soraarsitsisariaqanngikkunik sullissinermut akigititaminnik qaffaasariaqassapput, Qeqqata Kommuniani Demokraatit siulittaasuata tullia René B. Caspersen taama oqaateqaateqarpoq.

Qamuteralaatillit 22.000 koruuninik akitsuusersuiffigineqareerput, politikerilu isumaqarpoq akitsuuseeqqittoqarnera kommunimi amerlasuunut sunniuteqassasoq aammalu qamuteralaat ikinnerulernerannik kinguneqassasoq.

Demokraatineersup qamuteralannut akitsuut "qaavatigut akileraaqqinnertut" isigaa, akileraarutinillu qaffaanissaaq Demokraatit akerleriuaraat, Caspersen taama allappoq.

Qeqqata kommuniani politikerip aamma kissaatigaat qamuteralannut piumasaqaatit tamaa isigalugu annikillisarneqartariaqartut.

- Demokraatit siunissaq ungasinnerusoq eqqarsaatigalugu allannguisoqarnissaa kissaatigaat, qamuteralannik eqqussinermi akitsuut peerneqarluni, siulittaasup tullia René B. Caspersen taama allappoq.