Qamuteralaat atorlugit aavaqqusaanngilasi

Avannaani Nuussuarmi qamuteralaat atorlugit tuttunniartoqartarnerata ajornartorsiutaanera pillugu Avatangiisinut Pinngortitamullu Pisortaqarfik arlalinnit saaffigineqartaannarami, qamuteralaqarnermut attuumassuteqartunik aalajangersakkanik erseqqissaateqarpoq.

- Tuttut illersugaanerat pillugu namminersornerullutik Oqartussat nalunaarutaat naapertorlugu piniarnermi qamuteralaat atorneqarnissaat inerteqqutaavoq. Tassa qamuteralaat tuttunik ungoorinermi atoqqusaanngillat aamma qamuteralanniit tuttunniartoqaqqusaanngilaq, Avatangiisinut Pinngortitamullu Pisortaqarfimmit Jørgen Søholm ilisimatitsivoq.

Namminersornerullutik Oqartussat nalunaarusiaat naapertorlugu, Uummannap Upernaviullu kommuneqarfiini qamuteralaat atorlugit angallavigineqarsinnaasutut aalajangiunneqarsimasut sumiiffiillu motorilinnik angallavissatut immikkoortitaasut tassaapput, Upernaviup kommuniata avannamut killinganiit kujammut Uummannap kommuniata kujammut killerpiaaa tikkillugu.

Ilulissat kommunianni assartuutit motorillit atorneqarneri pillugit nalunaaruteqanngilaq, taamatuttaarlu qamuteralaat kommunimi atorneqarnerat pillugu ileqqoreqqusaqarani.

Inuussutissarsiorlutik angalasut aalajngersakkanit atuutsitsivigineqannginnissamik immikut qinnuteqarsinnaasut, Pisortaqarfik ilisimatitsivoq.

- Atuutsitsivigineqannginnissamik qinnuteqaat Avatangiisinut Pinngortitamullu Pisortaqarfimmut qinnutigineqassaaq, tassungali atatillugu erseqqissaatigissavarput, qamuteralaat atorlugit tuttunniarniarsinnaanermut qinnuteqartoqarsinnaanngimmat, Jørgen Søholm Avatangiisinut Pinngortitamullu Pisrtaqarfimmit taama erseqqissaateqarpoq.