Assi: Jette Arneborg

Qallunaatsiaat nunatta issinnera pissutigalugu qimassimagunarpaat

Qallunaatsiaat issisiukatallutik ukiuni 500-ni najugarereerlugu ukiut 1400-kkut atuunnerini Kalaallit Nunaat qimassimagunarpaat.

Ilisimatusaatigalugu misissuinermi, Danmarkimi Kalaallit Nunaannilu ujarassiuutut misissuiffimmeersoq Antoon Kuijpers siuttoralugu, ingerlanneqarsimasup tamanna takutippaa.

Taanna oqarpoq qilleraluni paasisat ersersissimagaat ukiut 1200-mit 1450-ip tungaanut ima issitsigisimasoq anorlerajullunilu, kangerluit Øster- aamma Vesterbygdenimiittut sikusimallutik; tamannalu qallunaatsiaat siornatigut misigisimanngikkaat.

Silap pissusiata isseqisup sikoqarneratalu nioqqutissanik angallassiniarnerat ajornakusoortissimassavaat, Kujataani Østerbygdenimit Nuup eqqaani Vsterbygdenimut. Soorlu aamma nioqqutissat Europameersut Europaliaassassallu angallanniarnerat ajornartissimassagaat, taamaattumillu qallunaatsiaat maanngaanniit qimaasariaqalersillugit.

Siusinnerusukkut uppernarsineqarsimavoq, nunaqarfiit taakku marluk ukiunik hunnorujunik nikingasunik qimanneqarsimasut. Maannamut ilisimatuunit tamanna nassuiarneqarsinnaasimanngilaq, taamaallaat eqqoriaanerit; paasisanili nutaani tassa siku, issi anorilu pisuutinneqarput.

- Taamaakkaluartoq takusinnaavarput qallunaatsiaat Nuup eqqaani Vesterbygdenimi ukiut hunnorujut sinneqartut tammannginnerminni naammagittarlutik inuusimasut. Imaassimagunarpoq, inuuginnarsimasinnaasut nioqqutissat inuillu Østerbygdenimit utimullu sikoqalinnginnerani assartorsimasinnaagamikkit, Anton Kuijpers videnskab.dk-mut oqarpoq.

Qallunaatsiaqarfiit inuit 2000-it 10.000-illu akornanniittut najugaqarfigisimassagaat ilimagineqarpoq.

Qallunaatsiaat Kalaallit Nunaanniissimanerannut uppernarsaat kingulleq tassaavoq Østerbygdenimi Hvalseymi katittoqarnera.

Qallunaat ilisimatuut silap pissusia Østerbygdenip Vesterbygdenillu avataanni immap naqqani ujaranngornikunik isaannarmillu takuneqarsinnaanngitsunik missuinermikkut paasiniarsimavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat