Qallunaatsiaat aarrit tuugaavi pillugit Nunatsinnut nunassissimasut

Qallunaatsiaat aarrit tuugaavi pinerullugit Nunatsinnut angalasarsimassangatinneqarput.
Assi © : Jette Arneborg
septembarip 18-at 2015 06:22
Nutserisoq Simon Uldum -

Danmarkimi qanganisarsiuut arlallit taama naliliipput. Taakku aarriit tuugaavinik itsaq niueruteqartarneq niuerniarlunilu aqqutaasarsimasut misissuiffigisimavaat. Aviisi Jyllands-Posten taama allaaserisaqarpoq.

Qallunaatsiaat nunaleriffissarsiorlutik ukiup 1000-ip missaani Islandimit Nunatsinnut nuussimanissaat siornatigut iliimagineqaraluarpoq. Aarrilli tuugaavisa ukiup 1000-ip missaaneersut aqerloqassusaannik misissuiffiginerisigut aarrit tuugaavi suminngaanneernersut qanganisarsiuut paasisinnaasimavaat.

 

Europami niuerfinnut qanittumik atassuteqarsimapput

Misissuinerisalu takutippaat aarriit ilarpassui Nunatsinni pisarineqarsimasut qallunaatsiaallu Europamut niuerutigiartortarsimassagaat.

Tamannalu qallunaatsiaat nunarsuarmi inissisimanerannik nutaamik ersersitsivoq, Søren Sindbæk, Ukiut akulliit aamma Renæssance pillugu qanganiarsarsiornermi professori Aarhusip Universitetianeersoq taama oqarpoq.

- Qallunaatsiaat Kalaallit Nunaanniittut nunarsuarmi avinngarusimallutik inuusutut isiginiarneqartarput - maannali paasisavut naapertorlugit tassaasimapput inuiaqatigiit aallaqqaataaniilli Europami niuerfinnut assigiinngitsunut qanittumik atassuteqartut.