Qallunaatsiaanik filmi
Qallunaatsiaat nunatsinniinnerat tammarnerallu filmigassanut ilaavoq, itsarnisarsiorneq, filmiliorneq eqqumiitsuliornerlu pillugit festivaleqarnerani, Kiel-imi ullumi aallartittumik ingerlanneqartumi GEUS-imit – Qallunaat Nunaanni Kalaallit Nunaannilu Ujarassiuut Misissuisoqarfianit -nalunaarutigineqarpoq.
Filmi ”Greenland´s lost civilization: A Norse Mystery” – kalaallisut ima nutserneqarsinaasoq: "Kalaallit Nunaanni atugartuussuseq tammartoq: qallunaatsiaat pillugit paasissaanngitsoq" aqagu takutinneqassaaq. Qallunaatsiaat ukiuni 500-it missaanni Nunatsinni inuuffigiuminaatsumi najugaqareerlutik tammariataarnerat, filmimi assigiinngitsutigut apeqqusersorneqarpoq.
Filmi immap naqqani ujarassiuut nunani tamalaanersut Kujataani 1998-mi angalaneranni immiussaavoq. Angalaneq GEUS-imi ilisimatuut suliniuteqarnerisigut tyskit ilisimatuut umiarsuaat Poseidon atorlugu naammassineqarpoq.
Ilisimatuut angalanerminni kangerluit naqqini ujaranngornernik paasissutissanillu nunap pissusiinut tunngasunik katersipput, qallunaatsiaat nunatsinniinnerminni silap pissusaa unammillersimasaat paasisaqarfiginerujumallugu.
